საქართველოს კათოლიკოს-პატრიარქი ილია მეორე ქვეყნის გარეთ მცხოვრებ ქართველებს მოუწოდებს, რომ "ზოგიერთთა ზიანის მომტანმა ქმედებებმა" არ უნდა დააბრკოლოს.

საპატრიარქოს მიერ გავრცელებულ განცხადებაში ნათქვამია, რომ ეკლესიის წინააღმდეგ განვითარებული მოვლენები ქვეყნის გარეთ მცხოვრებ ქართველებს მტკივნეულად შეეხო და ისინი გაანაწყენა:

"ლაზებო, ფერეიდნელებო, ტაო-კლარჯელნო, ჰერნო, საქართველოს ავბედობის გამო სამშობლოს მოწყვეტილნო საყვარელო ჩვენო ყოველნო შვილნო, არ დაგაბრკოლოთ ზოგიერთთა ზიანის მომტანმა ქმედებებმა; დრო გავა და, იმედი გვაქვს, ისინიც შეინანებენ თავის საქციელს; თქვენ კი გახსოვდეთ: საქართველოს და საქართველოს ეკლესიას უყვარხართ, სადაც არ უნდა იყოთ, თავისად მიაჩნიხართ, გული დიდად შესტკივა თქვენზე და ყოველთვის ეყოლებით მფარველობის ქვეშ."

ილია მეორეს თქმით, პრობლემების უმრავლესობა იქიდან მომდინარეობს, რომ საქართველოს მიმართებაში "მრავალთა ინტერესები იკვეთება".

რამდენიმე დღის წინ რუსთავი 2-მა გაავრცელა ინფორმაცია, რომ ვაკეში, მცხეთის ქუჩაზე მდებარე რეზიდენციაში, რომელიც ილია მეორეს ეკუთვნის, 2016 წლის აპრილში, ტერორიზმში, ადამიანების გატაცებასა და მკვლელობაში ბრალდებულ ძებნილებს მალავდნენ. ამის მტკიცებულებად ტელეკომპანია ილია მეორის დაცვის ყოფილი უფროსის, სოსო ოხანაშვილის ჩვენების აუდიოჩანაწერს ავრცელებს.

აუდიოჩანაწერში, სავარაუდოდ, ოხანაშვილი ჰყვება, რომ აღნიშნული პირები თურქეთის მოქალაქეები იყვნენ და ოფიციალური ანკარის მიერ ინტერპოლით იძებნებოდნენ.

როგორც რუსთავი 2 ოხანაშვილზე დაყრდნობით ამტკიცებს, აღნიშნულ რეზიდენციაში თურქეთის მოქალაქეები პატრიარქის მდივან-რეფერენტმა შორენა თეთრუაშვილმა და საპატრიარქოს უნივერსიტეტის სამეთვალყურეო საბჭოს თავმჯდომარემ, გიორგი ანდრიაძემ დააბინავეს.