ერთიანობა — ნაციონალური მოძრაობის თავმჯდომარე თინა ბოკუჩავა გამოკითხვაზე დაიბარეს. ოპოზიციონერი პოლიტიკოსი აცხადებს, რომ გამოკითხვაზე მისვლას არ აპირებს და მისი მეუღლე, ისევე როგორც თავად, მხოლოდ მაგისტრი მოსამართლის წინაშე გამოიკითხებიან.

"მეც დამირეკეს თბილისის პოლიციის დეპარტამენტიდან. ეს იგივე დეპარტამენტია, საიდანაც ზარი მიიღო კოტემ დღის განმავლობაში. მათ მთხოვეს გამოკითხვაზე მისვლა, თუმცა ბუნებრივია, მეც იგივე პასუხი გავეცი, რაც მათ კოტესგან მოისმინეს, რომ ჩვენ მხოლოდ მაგისტრატი მოსამართლის წინაშე დავიკითხებით. ჯერ დრო არ არის ცნობილი," — განაცხადა თინა ბოკუჩავამ ტელეკომპანია პირველის ეთერში.

მანამდე გამოკითხვაზე დაიბარეს თინათინ ბოკუჩავას მეუღლე, კოტე იოსელიანი.

იოსელიანმა დღეს სოციალურ ქსელში დაწერა, რომ უტა ივანიშვილისთვის მეორედ ბოდიშის მოხდა "არ ყოფილა არანაირი მორალური, თუ პრინციპული კომპრომისი", რადგან ის მისი "შვილების უსაფრთხოებას განსაზღვრავდა".

"რაზეც ერთხელ უკვე მოხდილი მქონდა ბოდიში სამართლიანად, იმაზე მეორედ ბოდიშის მოხდა არ ყოფილა არანაირი მორალური, თუ პრინციპული კომპრომისი, რაც მითუმეტეს რომ განსაზღვრავდა ჩემი შვილების უსაფრთხოებას.

რუსული, მდაბიო, მოღალატეობრივი და ანტი-ქართული რეჟიმი უნდა განადგურდეს და ამაში ისევ იქ ვდგავარ, სადაც ყოველთვის ვიდექი!" — დაწერა კოტე იოსელიანმა სოციალურ ქსელში.

ცნობისთვის, გუშინ კოტე იოსელიანმა გაავრცელა ვიდეო, სადაც ის 2018 წელს გაკეთებული განცხადების გამო ქართული ოცნების დამფუძნებლის და პარტიის საპატიო თავმჯდომარის, ბიძინა ივანიშვილის შვილს, უტა ივანიშვილის ბოდიშს მეორედ უხდის. ამასთან დაკავშირებით ენმ-ს თავმჯდომარემ თინა ბოკუჩავამ განაცხადა, რომ იოსელიანს ვიდეოს გამოქვეყნება მასზე განხორციელებული ზეწოლის გამო მოუწია.

ასევე იხილეთ: