დაიანა კრიუგერი ახალ მინისერიალში ჰოლივუდის ოქროს ხანის ერთ-ერთი დიდი ვარსკვლავის ჰეიდი ლამარის როლს მოირგებს.

"ვაღმერთებ ჰეიდი ლამარს, ის იყო ჭკვიანი, გაბედული, მნიშვნელოვანი და ლეგენდარული ფიგურა, რომელიც კინოვარსკვლავის გარდა უდიდესი გამოგონებების სათავეშიც იდგა. ერთი სული მაქვს როდის დავიწყებ მუშაობას და როდის ნახავს მაყურებელი ამ შთამაგონებელ ისტორიას გენიალური ქალის შესახებ", - ამბობს დაიანა კრიუგერი.

ჰედი ლამარი ავსტრიელ-ამერიკელი მსახიობი და MGM-ის ოქროს ხანის პერიოდის ერთ-ერთი დიდებული ვარსკვლავი იყო. ჰეიდი ასევე გამომგონებელიც იყო, ის ერთ-ერთი იმათგანია, ვინც განფენილობის სპექტრის კომუნიკაციების ადრეული ტექნიკა გამოიგონა, რაც კომპიუტერამდელი ეპოქიდან დღევანდელ დღემდე უკაბელო კომუნიკაციის სხვადასხვა ფორმების საწყისია, მოკლედ რომ ვთქვათ, დიდწილად ლამარის დამსახურებაა Wi-fi-ს საშუალებით ახლა ამ სტატიას რომ კითხულობთ.