"არ მოგცემთ ტყუილების თქმის უფლებას", - ამ სიტყვებით შეუშალეს ხელი თბილისის მერობის დამოუკიდებელ კანდიდატს, ალეკო ელისაშვილს ქართული ოცნების შტაბის წევრმა საზოგადოებრივ მაუწყებელთან ინტერვიუს დროს. ინტერვიუს ჩაწერის დროს ადგილზე მივიდა დიდუბის რაიონის გამგებლის მოადგილეც.

"სადაც, აი, მასეთ ტყუილებს გაბედავთ, სადაც, აი, ასეთ ტყუილებზე აგებულ საარჩევნო კამპანიის წარმოებას დაიწყებთ, ყველაგან მოვალ და ყველგან გეტყვით, რომ ეს არის ტყუილი და ასე არ გაგაგრძელებინებთ საარჩევნო კამპანიას, მორჩა", - ამბობდა ქართული ოცნების შტაბის წევრი, ირმა ბენდელიანი.

დიდუბის გამგებლის მოადგილისა და ქართული ოცნების შტაბის წევრის მიერ გამოთქმულ პროტესტს გამოეხმაურა საერთაშორისო გამჭვირვალობა - საქართველო.

"მიუხედავად იმისა, რომ მსგავსი ვერბალური პროტესტი არ წარმოადგენს კანონდარღვევას, თავისუფალი და სამართლიანი არჩევნებისათვის უწყებათაშორისი კომისია ყოველი არჩევნების წინ გამოსცემს რეკომენდაციას პოლიტიკური პარტიებისთვის, რათა მათმა აქტივისტებმა თავი შეიკავონ სხვა სუბიექტების სააგიტაციო შეხვედრებზე მისვლისა და ხელის შეშლისგან", - წერს საერთაშორისო გამჭვირვალობა - საქართველო ფეისბუკზე.