ზღაპრების უმრავლესობაში, რომლებსაც მშობლები თავიანთ პატარა გოგოებს უკითხავენ, ჩანს, რომ სასოწარკვეთილი ახალგაზრდა გოგოები გმირისგან შველას ელიან. ეს გმირები კი ყოველთვის კაცები არიან.

მაგალითად კონკია - მას თითქმის ყველაფერი აქვს, რაც სჭირდება - ლამაზია, კეთილი, შრომისმოყვარე. მაგრამ ბედნიერებისთვის პრინცის მიერ აღმოჩენა სჭირდება. ფიფქიას, სიკვდილის შემდეგ, ასევე თეთრ რაშზე ამხედრებული პრინცის კოცნა აცოცხლებს. მძინარე მზეთუნახავსაც პრინცის კოცნა სჭირდება, რომ გაიღვიძოს და ბედნიერი ცხოვრებით იცხოვროს. არიელს, ხმის დასაბრუნებლად და ადამიანების სამყაროში საცხოვრებლად, ასევე პრინცის კოცნა სჭირდება, რომელიც მას არც კი იცნობს.

ეს ზღაპრები გოგოებს პატარაობიდანვე უნერგავენ, რომ მათ მიზნების მისაღწევად და ბედნიერების მოსაპოვებლად სხვა გმირის პოვნა სჭირდებათ, რომლებიც მათ დახმარებას აღმოუჩენენ. ეს გმირები კაცები არიან.

მაგრამ წარმოიდგინეთ სიტუაცია, რომლის მიხედვითაც კონკია ბიჭია, რომელიც პრინცესამ უნდა გადაარჩინოს. წაუკითხავდით ამ ისტორიას თქვენს ბიჭებს ძილის წინ? სავარაუდოდ - არა. მაშინ, რატომ უკითხავთ კონკიას პატარა გოგოებს?

სიტუაციის გამოსასწორებლად უკვე არსებობს ინგლისურენოვანი წიგნი - Good Night Stories for Rebel Girls [ძილის წინ საკითხავი ამბები მეამბოხე გოგოებისთვის]. წიგნის პირველი ნაწილი 2016 წლის ბოლოს გამოვიდა და ის იმ 100 ქალის შესახებ ყვება, რომლებმაც ისტორია შეცვალეს.

საბავშვო წიგნში 100 ცნობილი ქალის ისტორია ზღაპრის ენაზეა დაწერილი, ილუსტრაციები კი მსოფლიოს მასშტაბით 60 ქალის მიერაა შექმნილი. წიგნი, რომელიც მალევე ბესტსელერი გახდა, 30 ენაზეა ნათარგმნი.

ფოტო: Timbuktu

ამ წიგნის წაკითხვის შემდეგ, ნებისმიერი გოგო უფრო მოტივირებული დაიძინებს და სკოლაშიც უფრო თავდაჯერებული წავა.

ცოტა ხნის წინ გამოვიდა წიგნის მეორე ნაწილიც, რომლის ონლაინ შეძენა უკვე შესაძლებელია.