პრინც ჰარის მამა არ ელაპარაკება

როგორც ჩანს, ბრიტანეთის სამეფო ოჯახში დრამა დასასრულს ჯერ არ უახლოვდება — პრინცმა ჰარიმ BBC-სთან ახლახან ემოციური ინტერვიუ ჩაწერა, სადაც ოჯახთან დაძაბულ ურთიერთობაზე, იმედგაცრუებასა და მათთან შერიგების სურვილზე საუბრობს.

პრინცის თქმით, "სასოწარკვეთილი იყო", როდესაც სასამართლო დავა წააგო ბრიტანეთში უსაფრთხოების საკითხთან დაკავშირებით — მას შემდეგ, რაც პრინცმა ჰარიმ და მისმა ცოლმა, მეგან მარკლმა სამეფო ტიტულებზე უარი განაცხადეს და ამერიკაში გადასახლდნენ, ბრიტანეთმა მათ დაცვაზე უარი განაცხადა. ამის გამო პრინცმა სასამართლო დავა წამოიწყო, რომელიც გასულ პარასკევს წააგო.

სასექსის ჰერცოგი ამბობს, რომ მეფე "მას აღარ ესაუბრება უსაფრთხოების თემის გამო", თუმცა თავად აღარ სურს ჩარლზ მესამესთან დავა, რადგან "არ იცის, რამდენი დრო დარჩა მამამისს" — წინა წელს ბუკინგემის სასახლემ გაავრცელა ინფორმაცია, რომ 76 წლის ჩარლზს სიმსივნე აქვს.

პარასკევს გამოტანილი სასამართლო გადაწყვეტილების შემდეგ პრინცმა აღნიშნა, რომ "ამ ეტაპზე ვერ წარმოიდგენს ისეთ სამყაროს, სადაც მისი ცოლისა და შვილების ბრიტანეთში გადმოყვანას შეძლებს".

"ძალიან ბევრი უთანხმოება იყო ჩემსა და ჩემი ოჯახის წევრებს შორის," — დაამატა მან, თუმცა ისიც თქვა, რომ ახლა "მათ უკვე ყველაფერი აპატია".

"ძალიან მინდა შერიგება ჩემს ოჯახთან. დავის გაგრძელებას აზრი არ აქვს — სიცოცხლე ხომ ასეთი ძვირფასია," — თქვა პრინცმა ჰარიმ, რომლის თქმითაც უსაფრთხოების საკითხი მის ოჯახთან ყოველთვის უთანხმოების მთავარი მიზეზი იყო.

ინტერვიუ BBC News-სთან პრინცმა ჰარიმ კალიფორნიაში ჩაწერა მას შემდეგ, რაც წააგო სარჩელი ბრიტანეთში ყოფნისას მისთვის და მისი ოჯახისთვის საჭირო დაცვის გამოყოფის თაობაზე.

ბუკინგემის სასახლის ოფიციალურ განცხადებაში ვკითხულობთ, რომ "ეს საკითხები არაერთხელ და დეტალურად იქნა განხილული სასამართლოში, და ყოველ ჯერზე ერთსა და იმავე დასკვნამდე მივიდნენ."

იხილეთ ასევე:

ბოლო ამბები:

გირჩევთ