Lorde საბოლოოდ ბრუნდება — ახალზელანდიელმა მუსიკოსმა ჩვენი მცირეხნიანი წვალების შემდეგ ახალი ალბომი დააანონსა. მომღერლის რიგით მეოთხე სტუდიური ალბომი, სახელწოდებით Virgin ("ქალწული"), დღის სინათლეს 27 ივნისს იხილავს.

სახელთან და გამოსვლის თარიღთან ერთად, პოპვარსკვლავმა ალბომის ყდაც გამოაქვეყნა. სურათზე მენჯის რენტგენოგრამა, ქამრის ბალთა, ელვა-შესაკრავი და კონტრაცეპტივი, ე.წ. სპირალი ჩანს.

"ვცდილობდი, საკუთარი თავი და ფემინურობა დამენახა", — ამბობს Lorde ალბომის ანონსში, — "ამ ალბომით ვამაყობ, მაგრამ ის მაშინებს კიდეც. ვერსად დავიმალები. მიმაჩნია, რომ ჩვენში ყველაზე ღრმად არსებული ნაწილების მუსიკაში გადმოცემა გვათავისუფლებს".

მუსიკოსი ამატებს, რომ ალბომის ფერი "გამჭვირვალეა", ენა კი — "სადა და არასენტიმენტალური".

როგორც ცნობილია, Virgin თერთმეტ სიმღერას გააერთიანებს. მათგან ჯერჯერობით მხოლოდ ერთის სახელი ვიცით — სინგლი What Was That, რომელიც რამდენიმე დღის წინ გამოვიდა.

Lorde, რომლის ნამდვილი სახელი ელა მარია ლენი იელიჩ-ო'კონორია, თანამედროვეობის ერთ-ერთ ყველაზე წარმატებული პოპვარსკვლავია. მის სახელზეა გრემის ორი ჯილდო და ოქროს გლობუსის ნომინანტობა. მუსიკოსს საყოველთაო აღიარება 16 წლის ასაკში გამოშვებულმა სადებიუტო ალბომმა Pure Heroine (2013) მოუტანა. კიდევ უფრო დიდი წარმატება ხვდა წილად მის მეორე ალბომს Melodrama (2017). Lorde-ის ამ დროისთვის ბოლო ნამუშევარი კი 2021 წელს გამოშვებული ალბომი Solar Power გახლავთ.

ახალზელანდიელი მომღერალი ჟურნალმა Time-მა 2013 და 2014 წლებში მსოფლიოს ყველაზე გავლენიან მოზარდებს შორისაც დაასახელა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...