სოციალური სამართლიანობის ცენტრი (SJC) ეხმაურება საქართველოს პროკურატურის განცხადებას სოლიდარობის ფონდების — "ნანუკას ფონდის", Prosperity Georgia-ს, "სირცხვილიას", "ფონდი ერთმანეთისთვის 24/7-ს" და "თბილისის ადამიანის უფლებათა სახლის" საბანკო ანგარიშებისა და მათზე არსებული თანხის დაყადაღებასთან დაკავშირებით.

SJC-ს შეფასებით, პროკურატურის მიღებული გადაწყვეტილება რეპრესიების და პოლიტიკური დევნის რიგითი მცდელობაა, რომლის მიზანიც მშვიდობიანი უწყვეტი პროტესტის ჩახშობაა. განცხადებაში ასევე ვკითხულობთ, რომ პროკურატურას არ აქვს სამართლებრივი დეტალები დაზუსტებული, რის მიხედვითაც ფონდების დაყადაღება განხორციელდა.

"პროკურატურის ცნობით, საქმე ეხება გამოძიებას, რომელიც საბოტაჟს, უცხოეთის ორგანიზაციების დახმარებასა და ეროვნული უშიშროების საწინააღმდეგო ქმედებებისთვის ფინანსების მობილიზებას უკავშირდება. უწყება აცხადებს, რომ ფონდები საპროტესტო აქციებთან დაკავშირებულ "კანონსაწინააღმდეგო" ქმედებებს და სამართალდამრღვევთა მატერიალურ მხარდაჭერას ახორციელებდნენ. პროკურატურას არ დაუზუსტებია ყადაღის დადების სამართლებრივ საფუძვლებთან დაკავშირებული დეტალები, მათ შორის, ის, თუ საპროცესო კოდექსით გათვალისწინებული რომელი საფუძვლით განხორციელდა ფონდების საბანკო ანგარიშების დაყადაღება.

ჩვენი შეფასებით, ფონდებთან დაკავშირებით მიღებული გადაწყვეტილება მშვიდობიანი უწყვეტი პროტესტის რეპრესირებისა და კრიმინალიზების კიდევ ერთი უხეში მცდელობაა, რომელიც ხელყოფს ქვეყანაში სამოქალაქო და პოლიტიკური უფლებების დაცულობას და ქართული ოცნების მხრიდან ავტორიტარიზმის კონსოლიდაციის აგრესიულ მცდელობას წარმოადგენს.

სოციალური სამართლიანობის ცენტრი აგრძელებს საკითხის შესწავლას და ფონდებისათვის სასამართლოს განჩინებების ჩაბარებისა და ანალიზის შემდგომ, საზოგადოებას დეტალურ სამართლებრივ ანალიზს დამატებით წარვუდგენთ" — ვკითხულობთ განცხადებაში.

შეგახსენებთ, 17 მარტს, საქართველოს პროკურატურამ სასამართლოს განჩინების საფუძველზე დააყადაღა: "ნანუკას ფონდის", "ფროსფერითის", "ფონდი ერთმანეთისთვის 24/7-ის", "სირცხვილიას" და "თბილისის ადამიანის უფლებათა სახლის" საბანკო ანგარიშები და მათზე არსებული ფულადი სახსრები დააყადაღა. ფონდები საზოგადოებრივი მოძრაობა ერთიანი ნეიტრალური საქართველოს წარმომადგენლის, ვატო შაქარიშვილის შეტანილი სარჩელის საფუძველზე დააყადაღეს.

პროკურატურის განცხადებაში ვკითხულობთ, რომ აღნიშნული ფონდები დამამძიმებელ გარემოებაში საბოტაჟის მცდელობის, უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზებისთვის დააყადაღეს. პროკურატურა პროევროპულ აქციებზე წერს, რომ ისინი "ძალადობრივი ხასიათსაა და გასცდა კანონით დადგენილ ფარგლებს"

ჟურნალისტ ნანუკა ჟორჟოლიანის განცხადებით, დაყადაღებული სოლიდარობის ფონდები და არასამთავრობო ორგანიზაციები, პროევროპულ აქციებზე დაკავებულთა ჯარიმებს იხდიდნენ და ქველმოქმედებას ეწეოდნენ, მათ შორის გურიასა და იმერეთში დაზარალებულებს ეხმარებოდნენ.