"ჩვენ გვაქვს ჩვენი პოლიტიკური დღის წესრიგი და ეს იქნება რიგგარეშე საპარლამენტო თუ თვითმმართველობის არჩევნები, ჩვენ მონაწილეობას მივიღებთ", — ამის შესახებ ტვ პირველის კორესპონდენტთან საუბრისას ალტ-ინფოს ერთ-ერთმა ლიდერმა, კონსტანტინე მორგოშიაm განაცხადა.

შეგახსენებთ, რომ საჯარო რეესტრმა პარტია კონსერვატორები საქართველოსთვის ოფიციალურად 22 აპრილს დაარეგისტრირა.

ზურა მახარაძე: "ჩვენი პარტია "კონსერვატორები საქართველოსთვის" ოფიციალურად დარეგისტრირდა"

"ჩვენ ყველა არჩევნებში მონაწილეობას ვიღებდით, გვაუქმებდნენ, მაინც რეგისტრაციაზე გავდიოდით. კიდე როცა გვაუქმებდნენ, სხვა პარტიას ვნახულობთ და ყველანაირი გზებით ქართულ პოლიტიკურ სპექტრში ჩვენი სიტყვა გვეთქვა. ჩვენი პარტიის გარდა რამდენიმე კვირით ადრე გიგა ბოკერიას და თამარ ჩერგოლეიშვილის პარტიაც დაარეგისტრირეს, ამიტომ არ შეიძლება ითქვას, რომ მარტო ჩვენი პარტია დაარეგისტრირეს. ჩვენ გვაქვს ჩვენი პოლიტიკური დღის წესრიგი და ეს იქნება რიგგარეშე საპარლამენტო თუ თვითმმართველობის არჩვნები, ჩვენ მონაწილეობას მივიღებთ", — ამბობს კონსტანტინე მორგოშია.

ალტ-ინფოს კიდევ ერთი ლიდერი, ზურა მახარაძე ამბობს, რომ თვითმმართველობის არჩევნების ლეგიტიმაციის პრობლემა არ იქნება, რადგან სხვა პარტიებიც მიიღებენ მონაწილეობას.

"ერთადერთი პოლიტიკური პარტია, რომელიც გააუქმეს ვართ ჩვენ. იმიტომ რომ წინა პარტია გაგვიუქმეს და ვერ შევძელით საპარლამენტო არჩევნებში მონაწილეობა. მათ შორის მათსავე სახალხო დამცველის ანგარიშში დაფიქსირებული, რომ ჩვენს მიმართ კონსტიტუციური უფლება დაირღვა. თვითმმართველობის არჩევნების ლეგიტიმაციის პრობლემა არ იქნება, რადგან სხვა პარტიების მიიღებენ მონაწილეობას", — აცხადებს ზურა მახარაძე.