ენმ-ის თავმჯდომარემ, თინა ბოკუჩავამ "პალიტრანიუსის" გადაცემაში "360 გრადუსში" იმ მიზეზებზე ისაუბრა, რის გამოც ნაციონალურმა მოძრაობამ სალომე ზურაბიშვილის ირგვლივ არსებული "წინააღმდეგობის პლატფორმა" დატოვა.

მისი თქმით, ამის მიზეზი 31 მარტის აქციაზე სალომე ზურაბიშვილის განცხადება იყო, "რომელმაც საზოგადოებისთვის ვერანაირი სიახლე ვერ გააჟღერა".

"31 მარტის აქციაზე, რომელიც მნიშვნელოვანი აქცია იყო ამ თარიღის ისტორიულობიდან გამომდინარე, თუმცა იმ განაცხადის შემდეგ, რომელიც სალომე ზურაბიშვილის მხრიდან მოვისმინეთ, რომელმაც, ჩემი აზრით, საზოგადოებისთვის ვერანაირი სიახლე ვერ გააჟღერა, ჩვენ ვთქვით, რომ ამ ფორმატში მონაწილეობას არ მივიღებდით.

ყველაზე დიდი დისტანცია ნაციონალურ მოძრაობასა და სალომე ზურაბიშვილს შორის არსებობდა. რატომ? იმიტომ, რომ ერთმა პროევროპულმა პრეზიდენტმა, რომელმაც სცადა შეემაგრებინა საქართველოში ევროპის დროშა, როდესაც მას რუსები გვართმევენ, არ შეიწყალა მეორე პრეზიდენტი. სალომე ზურაბიშვილს ამასთან დაკავშირებით არანაირი ახსნა არ ჰქონდა, ეს იყო პირად გემოვნებაზე დაფუძნებული გადაწყვეტილება. ეს იყო მისი ექსკლუზიური უფლება, რომელსაც ვერ შეეცილებოდა და ვერ შეედავებოდა ვერავინ", — განაცხადა ბოკუჩავამ.

ჟურნალისტის კითხვაზე, თუკი სალომე ზურაბიშვილი წინააღმდეგობის პლატფორმის ფარგლებში განცხადებას გააკეთებს, იქნება თუ არა მოაზრებული ნაციონალური მოძრაობაც, ბოკუჩავამ უპასუხა: "არა, რადგან ჩვენ იქ არ ვდგავართ".