დღეს ბათუმის საქალაქო სასამართლოში გამოცემა ნეტგაზეთისა და ბათუმელების დამფუძნებლისა და დირექტორის, მზია ამაღლობელის სასამართლო პროცესი გაიმართა.

დღეს ორი მოწმე — გურიის პოლიციის დეპარტამენტის გამომძიებელი, მიხეილ დარჩია და ბათუმის პოლიციის მე-6 განყოფილების უფროსი, არჩილ ანთაძე გამოიკითხნენ. რომლებიც უშუალოდ დაკავების და შემდგომ პროცესებში იყვნენ ჩართული.

ორივე მათგანმა განაცხადა, რომ ბათუმის პოლიციის უფროსს, ირაკლი დგებუაძეს ლოყაზე სიწითლე აღენიშნებოდა. ერთ-ერთმა — მიხეილ დარჩიამ დგებუაძის მიერ "განცდილ ტკივილზე" საუბრისას ღიმილი ვერ შეიკავა.

არჩილ ანთაძის თქმით, ინციდენტისას მზია ამაღლობელი ირაკლი დგებუაძეს პოლიციის ფორმაზე შეეხო და შემდეგ სახეში გაარტყა. მისი თქმით, ირაკლი დგებუაძეს, დარტყმის შედეგად სიწითლე აღენიშნებოდა.

"აჭარის პოლიციის დეპარტამენტთან ვიმყოფებოდი. "მონებო, გაათავისუფლეთ დაკავებულები", — ისმოდა აქციაზე. ქალბატონი მზია დავინახე, მაშინ როდესაც ორი არაფხიზელ მდგომარეობაში მამაკაცი იგინებოდა. ისინი დაკავებულები იყვნენ ადმინისტრაციული სამართალდარღვევის ფაქტზე. სწორედ ამაზე განმარტებას ითხოვდა მზია ამაღლობელი, რატომ დააკავეს ისინი. მოვიდა ირაკლი დგებუაძე განმარტების გაკეთების მიზნით. ირაკლი დგებუაძემ საუბარი რომ დაასრულა, ქალბატონმა მზიამ მოქაჩა და დაარტყა.

წესით სხვა დაკავებულებს, განმარტება გაუკეთდა, რომ ადმინისტრაციული წესით დაკავებულების გათავისუფლება იმ დღეს ვერ მოხდებოდა, ამას უხსნიდა ირაკლი დგებუაძე. ირაკლი დგებუაძეს ლოყაზე მოხვდა ხელი, იმ მომენტში პოლიციის დეტექტივის ფორმა ეცვა, ამის შემდგომ, მოხდა მზია ამაღლობელის დაკავება. მე ახლოს ვიყავი და დავეხმარე დაკავებაში.

დარტყმისას შეწითლება ჰქონდა ირაკლი დგებუაძეს, გარე განათებები არის და ჩანდა. გამომძიებელმა დაგვიბარა და დავადასტურე იგივე", — განაცხადა არჩილ ანთაძემ.

სასამართლო პროცესი 28 აპრილს გაგრძელდება.

IPN-ის ცნობით, ბათუმის საქალაქო სასამართლოში, ბათუმის პოლიციის უფროსი ირაკლი დგებუაძეც გამოიკითხება.