ფილოსოფოსი ზაზა შათირიშვილი ტრამპის ადმინისტრაციას საყვედურობს, რომ „ვერ იცლის“ სანქციები მოუხსნას ბიძინა ივანიშვილსა და ვახტანგ გომელაურს. ამის შესახებ ის წერილში წერს, რომელსაც ტელეკომპანია "იმედი" ავრცელებს.

მისი თქმით, სინამდვილეში არც არაფერი შეცვლილა და ტრამპის ადმინისტრაციის ხელით "დიფ სთეითი" ყველა იმ მტრულ საქმიანობას აგრძელებს, რომელიც ბაიდენის ადმინისტრაციის ხელით იყო დაწყებული.

"ბიძინა ივანიშვილს ბაიდენის ადმინისტრაციამ სანქციები დაუწესა რუსეთთან პარტნიორობის საბაბით, დღეს კი ტრამპის ადმინისტრაცია რუსეთთან თანამშრომლობით თავად იწონებს თავს, თუმცა, პარტნიორთან პარტნიორობაში დადანაშაულებულ ივანიშვილს სანქციებს არ უხსნის.

მაგნიტსკის სიაშია შეყვანილი საქართველოს ვიცე-პრემიერი და ტრამპის ადმინისტრაცია არც ამ აბსურდის გადახედვისთვის იცლის. ევროპას ადანაშაულებენ რუმინეთში საპრეზიდენტო არჩევნების უკანონოდ გაუქმებაში, თუმცა, დაჩაგრულ კანდიდატს მაინც არ აძლევენ არჩევნებში მონაწილეობის უფლებას და დაჭერასაც კი უპირებენ. საინტერესოა, რატომ არ დაასანქცირა ტრამპის ადმინისტრაციამ არავინ რუმინეთიდან, თუ საკონსტიტუციო სასამართლოს გადაწყვეტილება ნამდვილად აბსურდულად მიაჩნია. ერთმანეთის იდენტური სცენარებით გრძელდება აქციები სერბეთში, სლოვაკეთში, თურქეთში.

საქართველოშიც ქუჩაში დაგვიტოვეს რამდენიმე ასეული "დიფ სთეითის" აგენტი. ეს ფაქტები იმაზე მიუთითებს, რომ სინამდვილეში არც არაფერი შეცვლილა და ტრამპის ადმინისტრაციის ხელით "დიფ სთეითი" ყველა იმ მტრულ საქმიანობას აგრძელებს, რომელიც ბაიდენის ადმინისტრაციის ხელით იყო დაწყებული", — წერს შათირიშვილი წერილში, რომელსაც ტელეკომპანია ავრცელებს.