დევიდ ფინჩერი კვენტინ ტარანტინოს ოსკაროსანი ფილმის, Once Upon a Time in Hollywood-ის სცენარის მიხედვით სერიალს გადაიღებს. Variety-ს ინფორმაციით, პროექტს რეჟისორი ნეტფლიქსთან ერთად გადაიღებს, ბრედ პიტი კი კლიფ ბუთის, ლეონარდო დიკაპრიოს დუბლიორის როლს დაუბრუნდება.

სერიალის უნიკალური ხასიათი უკვე აშკარაა — კინოინდუსტრიის ისტორიაში პირველად ერთი გავლენიანი რეჟისორის მიერ შექმნილი ორიგინალური სცენარის მიხედვით მეორე მაღალპროფილური რეჟისორი გადაიღებს სერიალს.

ფოტო: Columbia Pictures

ცნობილია, რომ კვენტინ ტარანტინო თავისი მეათე და, ჭორების მიხედვით, საბოლოო ფილმის, The Movie Critic-ის გადაღებას სწორედ კლიფ ბუთის პერსონაჟზე აპირებდა, სცენარიც დაწერილი ჰქონდა და მთავარ როლში ბრედ პიტიც იყო დამტკიცებული, თუმცა ფილმის გადაღება ჩაიშალა.

თუმცა, კლიფ ბუთის როლს ბრედ პიტი მაინც უბრუნდება — როლს, რომლითაც პიტმა საუკეთესო მეორეხარისხოვანი როლის შემსრულებელი მსახიობის ნომინაციაში ოსკარი მოიპოვა, ახლა დევიდ ფინჩერის ლინზაში განასახიერებს. ფინჩერს და ბრედ პიტს ერთად არაერთ პოპულარულ პროექტში უთანამშრომლიათ, მათ შორისაა საკულტო ფილმები Fight Club, Se7en და The Curious Case of Benjamin Button.

ამ ეტაპზე სერიალის სიუჟეტზე ბევრი არაფერია ცნობილი, მაგრამ, როგორც Variety წერს, ტარანტინოს სცენარის მიხედვით გადაღებულ ნამუშევარში 1970-იანი წლების ჰოლივუდს ვიხილავთ. რაც შეეხებათ ლეონარდო დიკაპრიოსა და მარგო რობის, მათი დაბრუნება Once Upon a Time in Hollywood-ის გაგრძელებაში ნაკლებად სავარაუდოა.