მთავარი არხის დირექტორი გიორგი ქურდაძე განცხადებას ავრცელებს სადაც წერს, რომ კოალიცია ცვლილებებისთვის ლიდერმა, ნიკა გვარამიამ და ყოფილმა პარლამენტარმა კობა ნაყოფიამ ორი კვირის წინ მიიტაცეს მთავარი არხის სარეკლამო გაყიდვების შედეგად კომპანია "ნიუ სეილსის" ანგარიშზე აკუმულირებული 4 მილიონამდე ლარის თანხა.

მისივე თქმით, ნიკა გვარამიას განცხადება, რომ მთავარ არხს აღარ აქვს არანაირი დავალიანება, არის დიდი ტყუილი. მისივე თქმით, მთლიანობაში მთავარი არხის ვალი 25 მლნ-ს აღემატება.

ნიკა გვარამია და კობა ნაყოფია გიორგი ქურდაძის ბრალდებას ჯერ არ გამოხმაურებიან.

გიორგი ქურდაძის განცხადებას სრულად გთავაზოთ:

"ტვ პირველის 18 მარტის ეთერში პოლიტიკაში გარეულმა ვაიტელემენეჯერმა და მთავარი არხის ყოფილმა დირექტორმა ნიკა გვარამიამ განაცხადა: "მთავარ არხზე არ არსებობს არანაირი დავალიანება დღეის მომენტში, არანაირი", რადგან ეს თურმე მისი მორალური ვალდებულება ყოფილა.

ნიკა გვარამიას განცხადება, რომ მთავარ არხს ახლა აღარ აქვს არანაირი დავალიანება, არის დიდი ტყუილი.

მთავარ არხს დღეისათვის კვლავაც აქვს დავალიანებები, მათ შორის ტელეკომპანიის თანამშრომლების ხელფასები, ასევე მომსახურე კომპანიების დავალიანებები. სახელმწიფო ბიუჯეტის ვალი 13 მილიონ ლარზე მეტია. რომ არაფერი ვთქვათ ომეგა ჯგუფის მილიონობით დავალიანებებზე.

მთლიანობაში მთავარი არხის ვალი 25 მლნ-ს აღემატება.

ნიკა გვარამიამ და ყოფილმა პარლამენტარმა კობა ნაყოფიამ, რომლებიც არაფორმალურად მართავენ მთავარ არხს, ორი კვირის წინ, კიდევ ერთხელ დააზარალეს მთავარი არხი და მიიტაცეს „მთავარი არხის“ სარეკლამო გაყიდვების შედეგად კომპანია "ნიუ სეილსის" ანგარიშზე აკუმულირებული 4 მილიონამდე ლარის თანხა. სარეკლამო კომპანია "ნიუ სეილსი" ა.წ. 6 მარტს სიმბოლურ ფასად გაიყიდა ნიკა გვარამიასა და კობა ნაყოფიას მოფიქრებული თაღლითური სქემით.

"ნიუ სეილსის" ახალი ფიქციური დამფუძნებელი კობა ნაყოფიას უკრაინელი მძღოლი გახდა. ხოლო ფიქციური დირექტორი — 4 მლნ-მდე თანხის განკარგვის უფლება კი ამ ფიქციურმა პირებმა გადასცეს ნიკა გვარამიას თანაპარტიელსა და მეგობარ ვინმე მაკასარაშვილს.

ნიკა გვარამია და კობა ნაყოფია წლების განმავლობაში ერთად ძარცვავდნენ მთავარ არხს, იტაცებდნენ სარეკლამო შემოსავლებიდან მიღებულ მოგებას, შედეგად კი მთავარს არხს მილიონობით დავალიანებებს ადებდნენ.

ნიკა გვარამიამ და კობა ნაყოფიამ მიზანმიმართულად დააზარალეს მთავარი არხი, არხის მაყურებელი, თანამშრომლები, სახელმწიფო ბიუჯეტი და მთავარი არხის დამფუძნებელი ზაზა ოქუაშვილი, რომლის გარეშეც მთავარი არხი ვერ შეიქმნებოდა და არ იარსებებდა.

ყველა ზემოთ დასახელებულ პირს მოუწევს კანონის წინაშე პასუხისგება თავიანთ დანაშაულებრივ ქმედებებზე", — წერს გიორგი ქურდაძე.

მეტი მთავარი არხის შესახებ:

15 თებერვლის დილიდან “მთავარი არხის” მაუწყებლობა შეჩერებულია

"მთავარი არხის" ოპერატორი სერგი ბარამიძე მოსამართლე მანუჩარ ცაცუამ სამართალდამრღვევად ცნო და სიტყვიერი შენიშვნა გამოუცხადა

ოქუაშვილი: "მთავარის" გადასარჩენად საჭიროა დირექტორად ჟურნალისტებისა და საზოგადოებისათვის მისაღები პირი მოვიდეს

“მთავარი არხი” განცხადებას ავრცელებს სადაც წერს, რომ ოქუაშვილის დამაზიანებელი ქმედებების შედეგად მაუწყებლობას ვეღარ ახერხებს

გიორგი ქურდაძე გაბუნიას თანამდებობიდან გადადგომის რეგისტრაციას ითხოვს

"მთავარი არხის" ერთ-ერთი დირექტორი: ყველა ტყუილზე ვუპასუხებ შესაბამისი დოკუმენტებით

ზაზა ოქუაშვილი: მე მზად ვარ, რომ ჩავერთო პირდაპირ ეთერებში, გიორგი გაბუნიას მიერ გაკეთებული განცხადებების საპასუხოდ, რათა საზოგადოებას ჰქონდეს სრულ ინფორმაციაზე წვდომა

ნიკა გვარამია: ეს შანტაჟისტი გოგი, ცხადია ოქუაშვილის მითითებით და უკვე სრულიად დარწმუნებული ვარ ივანიშვილთან გარიგებით, არხს ფაქტობრივად ხურავს

ზაზა ოქუაშვილი: ტელეკომპანიის დახურვაზე არც მიფიქრია