მთავარი არხის ოპერატორ სერგი ბარამიძეს, რომელზეც 19 ნოემბერს, პოლიციამ იძალადა, მოსამართლე მანუჩარ ცაცუამ სიტყვიერი გაფრთხილება გამოუცხადა. ბარამიძის მიმართ გამოძიება ადმინისტრაციულ სამართალდარღვევათა კოდექსის 166-ე და 173-ე მუხლებით მიმდინარეობდა. 166-ე მუხლით დაწყებული სამართალწარმოება, რაც ხულიგნობას გულისხმობს, შეწყდა, თუმცა ოპერატორი სამართალდამრღვევად გამოცხადდა 173-ე მუხლით, რაც პოლიციელისათვის ხელის შეშლას გულისხმობს.

სასამართლო პროცესზე შსს-ს წარმომადგენელი ამტკიცებდა, რომ სერგი ბარამიძე ადგილზე უმისამართოდ იგინებოდა და პოლიციას მუშაობაში ხელს უშლიდა. თავად ბარამიძე ბრალს არ აღიარებს, რაც სასამართლოზეც განაცხადა — მისი თქმით, ადგილზე სწორედ ნიღბიანი პოლიციელები იგინებოდნენ.

სერგი ბარამიძე პოლიციამ 19 ნოემბერს, მელიქიშვილის გამზირზე, იმ დროს დააკავა, როცა ის სამსახურებრივ მოვალეობას ასრულებდა.