ბოლო თვეების განმავლობაში აქტიურად განიხილებოდა, გამოჩნდებოდა თუ არა ლეგენდარული კანადელი მომღერალი სელინ დიონი წლევანდელ ევროვიზიაზე, რომელსაც შვეიცარია უმასპინძლებს. დიონმა შვეიცარიას 1988 წლის ევროვიზიაზე მოუტანა გამარჯვება, ამის შემდეგ კი ქვეყანას კონკურსის მოსაგებად კიდევ 36 წელი დასჭირდა.

თუმცა, დიდი მოლოდინის და ევროვიზიის ორგანიზატორების მცდელობის მიუხედავად, სელინ დიონს 2025 წლის ევროფესტივალზე, დიდი ალბათობით, ვერ ვიხილავთ. შვეიცარიული გაზეთის, Le Matin-ის ცნობით, პოპვარსკვლავმა მიწვევაზე უარი ჯანმრთელობის პრობლემების გამო თქვა.

იგივე წყარო იტყობინება, რომ წლევანდელი კონკურსის ორგანიზატორები ახლა იტალიური როკჯგუფის Måneskin-ის სოლისტთან, დამიანო დავიდთან, აწარმოებენ მოლაპარაკებებს. 2021 წლის ევროვიზიაზე გამარჯვების შემდეგ, Måneskin-მა მსოფლიო დაიპყრო, დავიდმა კი შარშან სოლო კარიერაც დაიწყო. თავად მუსიკოსმა ცოტა ხნის წინ ევროვიზიაზე სტუმრის სტატუსით დაბრუნების სურვილი გამოთქვა.

რიგით 69-ე ევროვიზიის სიმღერის კონკურსი შვეიცარიის ქალაქ ბაზელში ჩატარდება. კონკურსის ნახევარფინალური ტურები 13 და 15 მაისს, ფინალი კი 17 მაისს გაიმართება. ევროპის ყველაზე მასშტაბურ მუსიკალურ ფესტივალზე წელს 37 ქვეყანა მიიღებს მონაწილეობას.

ამ დროისთვის საქართველო ერთადერთი ქვეყანაა, რომელსაც ჯერ კიდევ არ დაუსახელებია საკუთარი წარმომადგენელი ევროვიზია 2025-ზე.

ასევე იხილეთ: