ინგლისისა და კანადის ცენტრალური ბანკების ყოფილი თავმჯდომარე, 59 წლის მარკ კარნი კანადის შემდეგი პრემიერმინისტრი იქნება — ის კანადის მმართველი ლიბერალური პარტიის ლიდერად აირჩიეს და, შესაბამისად, მომდევნო დღეებში მოქმედ პრემიერ ჯასტინ ტრუდოს შეცვლის.

კარნის დიდი გამოცდა ელის, რადგან სწორედ მან უნდა შეიმუშაოს ეკონომიკური სტრატეგია, რომელიც აშშ-სთან სავაჭრო ომში ჩართულ ქვეყანას წარმატების მიღწევაში დაეხმარება — ასევე, მანვე უნდა ჩაატაროს უახლოეს მომავალში საპარლამენტო არჩევნები. კარნმა ლიბერალური პარტიის ლიდერობისთვის ბრძოლაში ფინანსთა ყოფილი მინისტრი კრისტია ფრილენდი დაამარცხა.

ჯასტინ ტრუდომ იანვარში განაცხადა, რომ 9-წლიანი პრემიერობის შემდეგ გადადგებოდა, რადგან მისი მხარდაჭერა ქვეყანაში მნიშვნელოვნად შემცირდა.

კამპანიის მიმდინარეობისას, კარნი აცხადებდა, რომ აშშ-ის მიმართ საპასუხო ტარიფების დაწესებას ემხრობოდა ინვესტიციების წამახალისებელ კოორდინირებულ ეკონომიკურ სტრატეგიას უჭერდა მხარს — ასევე, ის უკმაყოფილო იყო ეკონომიკური ზრდის ტემპით, რომელიც ქვეყანას ჯასტინ ტრუდოს პრემიერობის პერიოდში ჰქონდა.

აშშ-ისა და მისი ჩრდილობელი მეზობლის ურთიერთობა მნიშვნელოვნად დაიძაბა მას შემდეგ, რაც დონალდ ტრამპმა პრეზიდენტობის მეორე ვადის დაწყებისთანავე გამოთქვა სურვილი, რომ კანადა აშშ-ის 51-ე შტატი გახდეს. ასევე, ტრამპმა სავაჭრო პარტნიორ კანადას 25%-იანი ტარიფებიც დაუწესა.