აშშ-ის მთავრობის ეფექტურობის დეპარტამენტის (DOGE) ხელმძღვანელ ილონ მასკის განცხადებას იმის შესახებ, რომ Starlink სისტემა უკრაინული არმიის ხერხემალია და ის რომ გამოერთო, ფრონტი სრულად ჩამოინგრეოდა. პოლონეთის საგარეო საქმეთა მინისტრი რადოსლავ შიკორსკი გამოეხმაურა.

მან X-ზე დაწერა, რომ უკრაინისთვის Starlink-ებს პოლონეთის გაციფრულების სამინისტრო აფინანსებს, რაც წელიწადში დაახლოებით 50 მილიონი დოლარი ჯდება.

როგორც რადოსლავ შიკორსკი წერს აგრესიის მსხვერპლის მუქარა არაეთიკურია.

"უკრაინისთვის Starlink-ებს პოლონეთის გაციფრულების სამინისტრო აფინანსებს, რაც წელიწადში დაახლოებით 50 მილიონი დოლარი ჯდება.

აგრესიის მსხვერპლის მუქარის ეთიკური მხარე გვერდზე რომ გადავდოთ, თუ SpaceX არასანდო მომწოდებლად იქცევა, მოგვიწევს ალტერნატიული მომწოდებლების ძიება", — დაწერა შიკორსკიმ X-ზე.

მასკის პოლონეთის საგარეო საქმეთა მინისტრს X-ზე პასუხობს და მას "პატარა კაცს" უწოდებს.

"ჩუმად იყავი, პატარა კაცო. თქვენ [პოლონეთი} იხდით ღირებულების მცირე ნაწილს. Starlink-ის შემცვლელი არ არსებობს", — წერს მასკი.

მანამდე ილონ მასკმა X-ზე დაწერა, რომ მისი Starlink სისტემა უკრაინული არმიის ხერხემალია და ის რომ გამოერთო, ფრონტი სრულად ჩამოინგრეოდა.

"მე პუტინი უკრაინისთვის ერთი-ერთზე ფიზიკურ ბრძოლაში გამოვიწვიე და ჩემი Starlink სისტემა უკრაინული არმიის ხერხემალია. რომ გამომერთო, მათი ფრონტი სრულად ჩამოინგრეოდა.

რაც მაწუხებს არის ჩიხში შესული ხოცვა, რასაც უკრაინა გარდაუვალად წააგებს.

ნებისმიერს, ვისაც ეს ნამდვილად ადარდებს, ნამდვილად ფიქრობს და ესმის, სურს, რომ ხორცსაკეპი შეჩერდეს.

მშვიდობა ახლავე!!", — დაწერა მასკმა.

მოგვიანებით მასკმა სოციალურ პლატფორმა x-ზე დაწერა, რომ უკრაინაში Starlink ტერმინალებს არასდროს გათიშავს.

"სრულად გასაგები რომ იყოს — მიუხედავად იმისა, თუ რამდენად არ ვეთანხმები უკრაინის პოლიტიკას, Starlink ტერმინალებს არასდროს გათიშავს

მე უბრალოდ ვამბობ, რომ Starlink-ის გარეშე უკრაინული [ფრონტის] ხაზები ჩამოიშლებოდა, რადგან რუსებს ყველა სხვა სახის კომუნიკაციის ჩახშობა შეუძლიათ.

ასეთ რამეს არასდროს გავაკეთებდით ან არ გამოვიყენებდით მოლაპარაკებებში ბერკეტად", — მასკი.