საქართველოს მესამე პრეზიდენტი, მოქალაქეობის გარეშე დარჩენილი ყოფილი გუბერნატორი, მიხეილ სააკაშვილი პოლონეთიდან უკრაინის საზღვრის გადაკვეთას დღეს, 10 სექტემბერს აპირებს. უკრაინული გამოცემა უკრაინსკაია პრავდას ცნობით, სააკაშვილი პოლონეთში უკრაინელ პოლიტიკოსს, იულია ტიმოშენკოსა და სხვა დეპუტატებს შეხვდა.

რუსთავი 2-თან საუბრისას, შეხვედრას ადასტურებს თავად მიხეილ სააკაშვილიც და ამბობს, რომ მას 25 დეპუტატი ესწრებოდა. სააკაშვილის მტკიცებით, პოლონეთის საზღვარზე ჩავა ევროპარლამენტარი იაცეკ სარიუშ-ვოლსკი და შესაძლოა, პოლონელი დეპუტატებიც.

"უკვე არის უამრავი ადამიანი არის შეკრებილი. ძალიან გრძელი კოლონები მოდის ლვოვიდან. მთავარი მათი გეგმა არის არ შეშვება, მაგრამ ეშინიათ სახელმწიფო აპარატის, რადგან ამ სახელმწიფო აპარატს აქვს დაბალი მორალი. როგორც შევარდნაძის დროს იყო. ყველაფერი არის დამყარებული ფულზე და კორუფციაზე, მაგრამ ყველა ფიქრობს თავის მომავალზეც. ყველამ იცის, რომ ამ ოლიგარქების მმართველობას დიდი დღე არ უწერია."

მიხეილ სააკაშვილს უკრაინის მოქალაქეობა პრეზიდენტ პოროშენკოს გადაწყვეტილებით 26 ივლისს, ამერიკაში ვიზიტისას ჩამოერთვა. მიუხედავად ამისა, მას შემდეგ სააკაშვილი პოლონეთში, ლიტვაში და ბრიუსელში იმყოფებოდა. რამდენიმე საათში, ოდესის ყოფილი გუბერნატორი უკრაინის საზღვარზე ჩავა და მის გადაკვეთას შეეცდება. ამასთან, უკრაინის იუსტიციის მინისტრის თქმით, საქართველომ უკვე მესამედ მიმართა უკრაინულ მხარეს სააკაშვილის ექსტრადიციის მოთხოვნით.