შსს-ს ინფორმაციით, 5 მარტს "კრაბ კოფის" დამფუძნებლების სიტყვიერ და ფიზიკურ დაპირისპირების ფაქტზე მამაკაცი დააკავეს.

უწყების ცნობით, მომხდარ ფაქტზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

"თბილისში, ერთ-ერთ უბანში, "კრაბ კოფის" თანამშრომლებს კონფლიქტი მოუვიდათ მაღაზიაში მყოფ პირთან, რაც შემდგომში მაღაზიის გარეთ სიტყვიერ და ფიზიკურ დაპირისპირებაში გადაიზარდა," — აცხადებს შსს.

"კრაბ კოფის" დამფუძნებლები ქრისტი პირველი სოციალურ ქსელში წერს, რომ მას წინა კბილის ღრძილის მოტეხილობა აქვს, მეორე გოგონას კი ცხვირი აქვს მოტეხილი და ოპერაციას საჭიროებს.

ქრისტი პირველის ცნობით, 5 მარტს, საღამოს, საპროტესტო აქციაზე წასვლამდე, დიღმის მასივში, სახლთან, ერთ-ერთ სასურსათო მაღაზიაში შევიდნენ, რა დროსაც ერთმა პირმა მათ ჯერ სიტყვიერი შეურაცხყოფა მიაყენა, რასაც ფიზიკური დაპირისპირება მოჰყვა. ქრისტი პირველის თქმით, უცნობმა პირმა მას მუცელში ფეხი ჩაარტყა, რის შემდეგაც თავადაც სცემა იგი:

"მაღაზიაში ვიყავით. ვიღაც ბიჭმა სიტყვიერი შეურაცხყოფა მოგვაყენა მე და მეორე მეპატრონეს. წავედი მისკენ, მეთქი, ვის აყენებ სიტყვიერ შეურაცხყოფას-თქო და მაგაზე, გამოქცეულზე წიხლი ჩამარტყა მუცელში. მე კბილის მოტეხილობა მაქვს, მეორე გოგონას აქვს ცხვირის მოტეხილობა. ოპერაცია სჭირდება," — თქვა მან.

დაზარალებულის თქმით, პოლიციამ მათ სარჩელის უკან გატანა "ურჩია", რადგან კადრებში ჩანს, რომ თავდამსხმელს, საპასუხოდ, ისიც სცემს.

ცნობისთვის, "კრაბ კოფი" რუსთაველზე მიმდინარე აქციის მონაწილეებს დღემდე უსასყიდლოდ უმასპინძლდებოდა ჩაით, ყავითა და წყლით.

ასევე იხილეთ:

"კრაბ კოფის" დამფუძნებლებს თავდასხმის შედეგად კბილის და ცხვირის მოტეხილობა აქვთ - გამოძიება ძალადობის უხლით დაიწყო