30-ზე მეტმა საერთაშორისო მედიის ჟურნალისტმა იმუშავა გამოძიებაზე, რომელმაც თბილისში, ერთ-ერთი უდიდესი “ქოლ-ცენტრის” მფლობელების და თანამშრომლების ვინაობა გამოავლინა.

გამოძიებაზე შვედეთის საზოგადოებრივი მაუწყებლისთვის წყაროს მიერ მიწოდებულ მასალაზე დაფუძნებით ფლანგვის დეტექტორი, სტუდია მონიტორი, აი ფაქტი მუშაობდნენ, ხოლო კოორდინირება OCCRP-მა, საერთაშორისო საგამოძიებო ჟურნალისტიკის ორგანიზაციამ გაუწია.

ჟურნალისტური გამოძიების მიხედვით, თბილისის ცენტრში ნაქირავები ოფისიდან, თაღლითების ერთმა ჯგუფმა, რომელიც A.K Group-ის სახელით არის ცნობილი, ყალბი დოკუმენტებით და გამოგონილი ვინაობით, სხვადასხვა ქვეყნის მოქალაქეებს ბოლო 3 წლის განმავლობაში 35 მილიონ დოლარზე მეტი მოპარეს.

მერი რობერტსი, ქსენია კოენი, ენტონი ადამსი, კარლ გრინი, ალექსანდრე რიჩარდსი, ვერონიკა ნოვაკი, ლანა ლემანსი - ყველა ამ ყალბი ვინაობის უკან საქართველოს მოქალაქეები იმალებიან, რომლებიც სხვადასხვა ადამიანებისგან მოპარულ ფულს ფუფუნებაში გატარებულ შვებულებებსა და შოპინგში ხარჯავენ.

A.K. Group-ში 85 ადამიანი მუშაობს, რომლებიც შიდა მიმოწერაში ერთმანეთსაც ყალბი სახელებით ეკონტაქტებიან, თუმცა ჟურნალისტებმა მაინც მოახერხეს რამდენიმე ადამიანის ვინაობის დადგენა და თაღლითობის სქემის გამოაშკარავება. ჟურნალისტური გამოძიება სრულად წაიკითხეთ ფლანგვის დეტექტორზე.