"ჩვენ ვითვალისწინებთ ბალტიისპირეთის ქვეყნების გადაწყვეტილებას - ევროკავშირი მზადაა განახორციელოს შემდგომი ქმედებები, მათ შორის სანქციები, რათა პასუხისმგებელმა პირებმა პასუხი აგონ ძალადობაზე", — ამის შესახებ ბრიუსელში IPN-ს სპეციალურ კორესპონდენტს ევროკავშირის პრესსამსახურის ოფისში განუცხადეს.

მათი ცნობით, ქართული ოცნების რეპრესიების პოლიტიკა მიზნად ისახავს ფუნდამენტური უფლებებისა და თავისუფლებების შელახვას.

"ჩვენ ვითვალისწინებთ ბალტიისპირეთის ქვეყნების გადაწყვეტილებას. ქართული ოცნების რეპრესიების პოლიტიკა მიზნად ისახავს ფუნდამენტური უფლებებისა და თავისუფლებების შელახვას და სამოქალაქო საზოგადოების მოქმედების სივრცის კიდევ უფრო შემცირებას.

ამის გამო, ევროკავშირი უკვე იღებს ზომებს: ევროკავშირმა შეამცირა პოლიტიკური კონტაქტები საქართველოს ხელისუფლებასთან, გარდა იმ კონტაქტებისა, რომლებიც ორიენტირებულია არსებული სიტუაციიდან გამოსავლის პოვნაზე; ევროკავშირმა შეწყვიტა საქართველოს ხელისუფლებისთვის 120 მილიონ ევროზე მეტის პირდაპირი დახმარება; ჩვენ შევაჩერეთ 30 მილიონი ევროს მხარდაჭერის ღონისძიება 2024 წლისთვის ევროპის სამშვიდობო ფონდის მეშვეობით და არ ვგეგმავთ რაიმე სახის მხარდაჭერის ღონისძიებას 2025 წელს;

ევროკავშირი აძლიერებს სამოქალაქო საზოგადოებისა და დამოუკიდებელი მედიის მხარდაჭერას; ამავდროულად, ჩვენ გავაგრძელებთ მჭიდროდ მონიტორინგს უახლესი საკანონმდებლო ინიციატივების გავლენას სამოქალაქო საზოგადოების ორგანიზაციებსა და დამოუკიდებელ მედიაზე;

ცოტა ხნის წინ, [ევროპულმა] საბჭომ უვიზო მიმოსვლა შეუჩერა დიპლომატიური და ოფიციალური პასპორტების მქონე ქართველ დიპლომატებს, ოფიციალურ პირებსა და მათ ოჯახებს. ევროკავშირი მზადაა განახორციელოს შემდგომი ქმედებები, მათ შორის სანქციები, რათა პასუხისმგებელმა პირებმა პასუხი აგონ ძალადობაზე", — აცხადებენ ევროკავშირის პრესსამსახურის ოფისში.

3 მარტს ესტონეთის საგარეო საქმეთა სამინისტროს ვებგვერდზე საქართველოს 55 მოქალაქის სანქცირების შესახებ ინფორმაცია გამოქვეყნდა.

სანქცირებულ პირთა შორის არიან პროკურორები, მოსამართლეები, პოლიციელები და პარლამენტის წევრები, რომლითაც ესტონეთში შესვლა აეკრძალათ.

ესტონეთის საგარეო საქმეთა მინისტრმა მარკუს ცაჰკმა განაცხადა, რომ ჩამოთვლილი სანქცირებული პირები მონაწილეობდნენ ძალადობაში, ან ემუქრებოდნენ მომიტინგეებს. ცაჰკანმა ასევე დასძინა, რომ საქართველოში გამოყენებული ძალადობა მომიტინგეების, ჟურნალისტებისა და ოპოზიციის ლიდერების მიმართ არის მიუღებელი, კრიმინალური და ადამიანის უფლებების დარღვევა.

ესტონეთის მიერ სანქცირებული არიან ბათუმელებისა და ნეტგაზეთის დამფუძნებლისა და დირექტორის, მზია ამაღლობელის საქმის პროკურორები: ვლადიმერ თურმანიძე და თორნიკე გოგეშვილი; ბათუმის პოლიციის უფროსი, საქმეში "დაზარალებულად" ცნობილი ირაკლი დგებუაძე, მოსამართლეები — ნინო სახელაშვილი და ვერა დოლიძე.

ესტონეთისგან ასევე სანქცირებული არიან ქართული ოცნების პარლამენტის წევრები: ლაშა ტალახაძე, ირაკლი ზარქუა, ვიქტორ სანიკიძე, გელა სამხარაული, ბექა ოდიშარია.

მანამდე, 2024 წლის დეკემბერში, ესტონეთმა სანქციები დაუწესა 28 ქართველ მაღალჩინოსნებს. მათ შორის: ქართული ოცნების საპატიო თავმჯდომარე ბიძინა ივანიშვილს, ოცნების პრემიერ ირაკლი კობახიძეს, ოცნების ლიდერ მამუკა მდინარაძეს, ოცნების შს მინისტრ ვახტანგ გომელაურს, მისი მოადგილეს ალექსანდრე დარახველიძეს, გენპროკურორი გიორგი გაბიტაშვილს, ქალაქის მერ კახა კალაძეს, ვიცე-სპიკერ თეა წულუკიანს და სხვა პირებს: