დონალდ ტრამპმა ჟურნალისტებს განუცხადა, რომ აშშ-ს წინა პრეზიდენტების დროს რუსეთმა საქართველო და ყირიმი "წაიღო", ბაიდენის დროს მთელი უკრაინის "წაღება" სცადა, მისი პრეზიდენტობის დროს კი "ვერაფერი მიიღო".

ტრამპმა თქვა, რომ სჯერა, რუსეთსაც და უკრაინასაც სურს გარიგების დადება, რადგან ისინი დაიტანჯნენ უფრო მეტად, ვიდრე ნებისმიერი სხვა ერი.

"პრეზიდენტ ბუშის დროს მათ მიიღეს საქართველო. რუსეთმა მიიღო საქართველო; პრეზიდენტ ობამას დროს მათ მიიღეს კარგი, დიდი წყალქვეშა ხომალდების ბაზა. მიწის დიდი ნაჭერი, სადაც მათ ჰყავთ თავიანთი წყალქვეშა ნავები. იცით ეს, არა? ყირიმი; პრეზიდენტ ტრამპის დროს მათ ვერაფერი მიიღეს; პრეზიდენტ ბაიდენის დროს სცადეს მთელი უკრაინის მიღება. მე რომ აქ არ მოვსულიყავი, ისინი მიიღებდნენ მთელ რაღაცას. ასე რომ, შემიძლია მხოლოდ ვთქვა, რომ შეგიძლიათ, დაუბრუნდეთ ბუშს, ობამასა და ბაიდენს. მათ ბევრი წაიღეს. ერთადერთი, რაც მათ არ მიუღიათ, იცით, რა მივეცი მათ? მე მივეცი მათ [უკრაინას] ტანკსაწინააღმდეგო რაკეტები. აი, რა მივეცი მათ. მე მივეცი მათ სანქციები რუსეთის მიმართ. მე მივეცი მათ "ჯაველინები", – განუცხადა დონალდ ტრამპმა ჟურნალისტებს.

შეგახსენებთ, რომ 3 მარტს დონალდ ტრამპმა სოციალურ ქსელ Truth Social-ზე პოსტი გამოაქვეყნა. სადაც დაწერა, რომ "ხვალ, [4 მარტს] "იტყვის ყველაფერს ისე, როგორც არის".

"ხვალ დიდი ღამე იქნება. ვიტყვი ყველაფერს ისე, როგორც არის!", — წერს აშშ-ის პრეზიდენტი.

კიდევ ერთ პოსტში უკრაინაში მიმდინარე ომს ეხება — ტრამპი წერს, რომ ის ერთადერთი პრეზიდენტია, ვისაც უკრაინის მიწა პუტინის რუსეთისთვის არ გადაუცია.

"ერთადერთი პრეზიდენტი, რომელსაც უკრაინის მიწა პუტინის რუსეთისთვის არ მიუცია, დონალდ ტრამპია. გახსოვდეთ ეს, როდესაც სუსტი და არაეფექტიანი დემოკრატები კრიტიკოსობენ, ხოლო ყალბი მედია სიხარულით ავრცელებს მათ ნებისმიერ ნათქვამს!", — აცხადებს დონალდ ტრამპი.

ცნობისათვის, 4 მარტს დონალდ ტრამპი კონგრესის ერთობლივ სესიას პრეზიდენტობის მეორე ვადაში პირველად მიმართავს.