ვენეციის კომისიამ დღეს, 3 მარტს გამოცემულ "გადაუდებელი მოსაზრების" დოკუმენტში მკაცრად გააკრიტიკა ქართული ოცნების პარლამენტის მიერ ადმინისტრაციულ სამართალდარღვევათა კოდექსსა და "შეკრებებისა და მანიფესტაციების შესახებ" კანონში მიღებული რეპრესიული ცვლილებები.

ვენეციის კომისიის გადაუდებელი მოსაზრება ევროპის საბჭოს საპარლამენტო ასამბლეის პრეზიდენტმა, თეოდოროს რუსოპულოსმა მოითხოვა.

დოკუმენტში კომისია ხაზს უსვამს ფაქტს, რომ კანონპროექტები ოცნების პარლამენტმა დაჩქარებული წესით მიიღო, შესაბამისი დაინტერესებული მხარეების მონაწილეობის გარეშე, რაც აქციების ფართო პოლიტიკური კონტექსტის გათვალისწინებით, მათ ლეგიტიმურობას კითხვის ნიშნის ქვეშ აყენებს.

კომისიის შეფასებით, კანონში შეტანილი ცვლილებები შეიცავს არაერთ ბუნდოვან და ფართოდ ფორმულირებულ დებულებას, რაც მნიშვნელოვნად ზრდის მათ ბოროტად გამოყენების რისკს.

ვენეციის კომისია მოუწოდებს ქართულ ოცნებას, გადახედოს მიღებულ ცვლილებებს და დახვეწოს ისინი, რადგან ამ ფორმით ისინი ზღუდავენ შეკრებისა და გამოხატვის თავისუფლებებს და არღვევენ პროპორციულობის პრინციპს.

ინფორმაციისთვის, აღნიშნული ცვლილებებით, დემონსტრაციის მონაწილეებს აეკრძალათ სახის დაფარვა და ლაზერის ტარება, მნიშვნელოვნად გაიზარდა შეკრების ან მანიფესტაციის წესების დარღვევისთვის გათვალისწინებული ჯარიმები, 15 დღიდან 60 დღემდე გაიზარდა ადმინისტრაციული პატიმრობის ვადა და ა.შ.