პოლონეთის პრემიერმინისტრმა, დონალდ ტუსკმა ლონდონში საერთაშორისო ლიდერების სამიტზე განაცხადა, რომ პოლონეთი უკრაინის მხარესაა, ყოველგვარი "მაგრამის" გარეშე.

"ნათელი უნდა იყოს, რომ პოლონეთი უკრაინის მხარესაა, ყოველგვარი "მაგრამის" გარეშე", — განაცხადა დონალდ ტუსკმა.

ტუსკის თქმით, ევროპამ კვლავ უნდა იმუშაოს შეერთებულ შტატებთან რაც შეიძლება მჭიდრო ალიანსზე, მაშინაც კი, თუ აშშ-ის ადმინისტრაციის პოზიცია უკრაინა-რუსეთის ომთან დაკავშირებით ისეთივე პირდაპირი არ არის, როგორც ევროპის. პოლონეთის პრემიერმინისტრმა ასევე დასძინა, რომ აშშ-ის პრეზიდენტის, დონალდ ტრამპის სურვილია ევროპამ აიღოს ბევრად მეტი პასუხისმგებლობა ამერიკის რუსეთისგან დაცვაზე, რასაც ის პარადოქსულად აფასებს.

"ევროპა, რომელსაც ესმის მისი გლობალური პოტენციალი, მისი, როგორც სუპერსახელმწიფოს სტატუსი, იქნება არა აშშ-ის ალტერნატივა, არამედ ყველაზე სასურველი მოკავშირე. საბოლოო ჯამში, ეს არის ის, რაც ტრამპს სურს, რომ ევროპამ აიღოს ბევრად მეტი პასუხისმგებლობა თავის უსაფრთხოებაზე. პარადოქსია, რომ 500 მილიონი ევროპელი 300 მილიონ ამერიკელს 140 მილიონი რუსისაგან დაცვას სთხოვს", — აღნიშნა ტუსკმა.

ამასთან, ტუსკმა ხაზი გაუსვა, რომ ევროპამ თავდაცვის ხარჯები უნდა გაზარდოს, რადგან ეს საჭიროა, როგორც "დამატებითი სადაზღვევო პოლისი".

შეგახსენებთ, დონალდ ტუსკი ლონდონში იმყოფება, სადაც ის საერთაშორისო ლიდერების სამიტში მიიღებს მონაწილეობას, რომელსაც გაერთიანებული სამეფოს პრემიერმინისტრი კირ სტარმერი მასპინძლობს.