2021 წლის სექტემბერში კორონავირუსით გარდაცვლილი 20 წლის ფეხბურთელის, ვახტანგ ჩარკვიანის საქმეზე ბრალდებულ ექიმს, ქეთევან ლობჟანიძეს, მოსამართლე ირაკლი შვანგირაძემ აღკვეთის ღონისძიების სახით 12 000-ლარიანი გირაო შეუფარდა.

პროკურატურა ბრალდებულისათვის 15 000-ლარიან გირაოს შეფარდებას, ხოლო დაცვის აღკვეთის ღონისძიების გარეშე დატოვებას ითხოვდა.

გამოძიების ცნობით, ექიმმა, რომლის უშუალო ჩართულობითაც მკურნალობის პროცესი მიმდინარეობდა, არ გაითვალისწინა პაციენტის კლინიკური მდგომარეობის მართვის შესაბამისი პროტოკოლი და პაციენტს მედიკამენტური მკურნალობა აუცილებელი კვლევის ჩატარების გარეშე დაუნიშნა.

ექიმს ბრალდება სისხლის სამართლის კოდექსის 220 პრიმა მუხლის მეორე ნაწილით წარედგინა, რაც "გულგრილობას, სპეციალური უფლებამოსილების მქონე პირის მიერ თავისი სამსახურებრივი მოვალეობის შეუსრულებლობას ან არაჯეროვნად შესრულებას მისდამი დაუდევარი დამოკიდებულების გამო, რამაც მძიმე შედეგი გამოიწვია" გულისხმობს და სასჯელის სახით 2-დან 5 წლამდე თავისუფლების აღკვეთას ითვალისწინებს.

ვახტანგ ჩარკვიანი 2021 წელს, 20 წლის ასაკში დაიღუპა — ექიმებმა მიზეზად კორონავირუსი დაასახელეს, თუმცა ოჯახი ამ ვერსიას არ ეთანხმებოდა და დამოუკიდებელი ექსპერტიზა ჩაატარეს, რომელმაც დაადგინა, რომ ჩარკვიანის გარდაცვალება ზედოზირებამ გამოიწვია

ოჯახმა დამოუკიდებელი ექსპერტიზა ჩაატარა, რითაც დადგინდა, რომ 20 წლის ბიჭის გარდაცვალება ზედოზირებამ გამოიწვია. საქმის მასალებით დგინდება, რომ პაციენტს 20 დღის განმავლობაში 530 ამპულაზე მეტი ფენტანილი და მიდაზოლამი გაუკეთეს. საქმეზე რესპუბლიკური საავადმყოფოს ექთანს პატიმრობა აქვს შეფარდებული — მას გამოძიება დოკუმენტების გაყალბებას ედავება.