ჩვენ მხარი დავუჭირეთ კონკრეტულად ამერიკულ რეზოლუციას, რომელიც არის მომზადებული "დიფ სთეითის" ყოველგვარი ჩარევის გარეშე, — ამის შესახებ ოცნების პრემიერმინისტრმა, ირაკლი კობახიძემ განაცხადა.

"ჩვენ ამ სამი წლის განმავლობაში შევუერთდით 600-ზე მეტ დოკუმენტს, მათ შორის, რეზოლუციებს სხვადასხვა ტიპის საერთაშორისო ფორმატში მიღებულ დოკუმენტებს, რომელიც გმობდა რუსეთის სამხედრო აგრესიას უკრაინაში, რომელიც მხარს უჭერდა უკრაინის სუვერენიტეტს და ტერიტორიულ მთლიანობას. ჩვენი პოზიცია ამასთან დაკავშირებით რჩება ურყევი. ჩვენ შევუერთდით ამერიკის შეერთებული შტატების მიერ მომზადებულ რეზოლუციას, რომელიც არის ასევე მხარდამჭერი უკრაინის მიმართ.

ჩვენ მხარს ვუჭერთ ამერიკის შეერთებული შტატების ხელისუფლების სამშვიდობო გეგმას და იმედი გვაქვს, რომ ეს გეგმა იქნება წარმატებული ძალიან მალე. ჩვენთვის მნიშვნელოვანია, შევუერთდეთ იმ სუბიექტის რეზოლუციას, რომელიც არის მშვიდობისკენ მიმართული და არა ომის გახანგრძლივებისკენ", — განაცხადა კობახიძემ

გაეროს უშიშროების საბჭოს წევრებმა, რომლის შემადგენლობაშიც საქართველო არ არის, 24 თებერვალს უკრაინასთან დაკავშირებით აშშ-ს მიერ შემუშავებული რეზოლუციის პროექტი მიიღო, რომელსაც რუსეთ-უკრაინის კონფლიქტისადმი ნეიტრალური პოზიცია აქვს. დოკუმენტში არ არის მითითებული, ვინ დაიწყო ომი და არ მოიცავს კონკრეტულ მოთხოვნებს კრემლის მიმართ.

საქართველომ გაერო-ს გენერალურ ასამბლეაში ამერიკულ რეზოლუციას მხარი დაუჭირა, ხოლო ევროპულ-უკრაინული რეზოლუციაზე კენჭისყრისას თავი შეიკავა.

ამავე თემაზე: