ქართული ოცნების გენერალურმა მდივანმა, კახა კალაძემ ჟურნალისტებთან განაცხადა, რომ ახლა აშშ-ს პრეზიდენტის, დონალდ ტრამპის მთავარი საზრუნავი "დიფ სთეითის" დამარცხებაა.

"მესმის, შევდივარ მათ მდგომარეობაში. ესენი არიან რადიკალური დაჯგუფების წარმომადგენლები, რომლებსაც პატრონები ჰყავთ, მათი პატრონები მძიმე მდგომარეობაში არიან. იცით, რომ ტრამპის მთავარი საზრუნავი არის "დიფ სთეითის" დამარცხება, ეს პროცესები მიმდინარეობს ახლა. ის რაც მსოფლიოში ხდებოდა, ომები, თუნდაც რუსეთ-უკრაინის ომი, ეს შემთხვევითი პროცესი არ არის. ეს არის წინასწარ დაგეგმილი ქმედებები, რის შედეგადაც უკრაინა დაზიანდა. კატასტროფული მდგომარეობაა, განადგურებულია სოფლები, დაკარგულია ტერიტორიები, კაცობრიობისთვის იმაზე მძიმე, რაც ომია, წარმოუდგენელია რა უნდა იყოს. საქართველოშიც არ სიამოვნებთ, მძიმე მდგომარეობაში არიან, მათი პატრონები მარცხდებიან. რადიკალიზმი ყველგან დამარცხდება სადაც არ უნდა იყოს. გინდ საქართველოში, გინდ მსოფლიოში", — განაცხადა კალაძემ.

კალაძემ თქვა, რომ უკრაინაზე საუბარი არ სურს, ვინაიდან უკრაინა უმძიმეს მდგომარეობაშია.

"არ მინდა უკრაინაზე საუბარი. ერთხელ ვთქვი, რომ ის არ ეკუთვნის საკუთარ თავს და ქვეყანას, ხალხს. კონკრეტიკაში არ მინდა შევიდე. უკრაინა უმძიმეს მდგომარეობაშია. უკრაინელი ხალხი მიგვაჩნია მეგობრად, მძიმეა ის მდგომარეობა, რაც იქ ხდება. რაც შეეხება ჩვენს პრაგმატულ პოლიტიკას, ჩვენი ქვეყნის ინტერესებიდან გამოვდივართ, ჩვენ ვართ ხალხის მიერ არჩეული ხელისუფლება", — აღნიშნა კალაძემ.