კანადის პრემიერმინისტრმა ჯასტინ ტრუდომ განაცხადა, რომ კანადა ყოველთვის უკრაინის მხარდამჭერი იქნება. ტრუდოს ვიდეომიმართვის დეტალებზე The Hill წერს.

"კანადა და ჩვენი მოკავშირეები ცალსახად დგანან ვლადიმერ პუტინის მიერ საერთაშორისო წესრიგის უკანონო, ამორალური, უსამართლო დარღვევების წინააღმდეგ. მოუთმენლად ველოდები ჩემს ევროპელ პარტნიორებთან შეხვედრას რათა ვისაუბროთ იმაზე, თუ როგორ გავაგრძელებთ უკრაინის და იმ წესების დასაცავად დგომას, რომლებიც ყველას უსაფრთხოდ გვიცავს", — თქვა ტრუდომ.

მისი თქმით, უკრაინელები იბრძოდნენ და დაიღუპნენ არა მხოლოდ თავიანთი სუვერენიტეტის, ტერიტორიული მთლიანობის დასაცავად, ისინი ასევე იბრძვიან წესებზე დაფუძნებული წესრიგის დასაცავად, რომელიც თითქმის 80 წლის განმავლობაში იცავდა ყველას უსაფრთხოებას მთელს მსოფლიოში.

ტრუდომ X-ზე გამოაქვეყნა ვიდეომიმართვა და დაწერა: "კანადა ყოველთვის უკრაინის გვერდით იქნება".

შეგახსენებთ, ტრამპმა უკრაინის ლიდერს ვოლოდიმირ ზელენსკის "დიქტატორი" უწოდა და ქვეყანაში არჩევნების ჩატარებაზე უარის თქმაში დაადანაშაულა.