რუსეთის საგარეო საქმეთა მინისტრმა, სერგეი ლავროვმა, 19 თებერვალს "3+3" ფორმატსა და მასში საქართველოს პოტენციურ მონაწილეობაზე ისაუბრა. ლავროვის თქმით, მათ "ესმით საქართველოს პოზიციის ეჭვები და ნიუანსები", თუმცა მიუხედავად ამისა, საქართველოსთვის კარი ღიაა და სკამი დარბაზში ყოველთვის არის.

"თავიდანვე ყველა შევთანხმდით, რომ ჩვენ სწორედ 3+3 ფორმატი გვაქვს და გვესმის საქართველოს პოზიციის ნიუანსები და ეჭვები, თუმცა საქართველოს წარმომადგენლებისთვის ამ ფორმატის სხდომათა დარბაზში სკამი ყოველთვის იქნება — ჩვენ დავუდასტურეთ ქართულ მხარეს, რომ კარები ღიაა, სკამი დგას", — განაცხადა სერგეი ლავროვმა.

ლავროვის შეფასებით, საქართველოს ამჟამინდელი მთავრობა მოქმედებისას "ქვეყნის ეროვნულ ინტერესებს" ეყრდნობა.

ინფორმაციისთვის, 3+3 ფორმატი მოიაზრებს რეგიონის ქვეყნების (რუსეთი, ირანი, თურქეთი — სომხეთი, აზერბაიჯანი და საქართველო) თანამშრომლობის ფორმატს. პლატფორმის ფარგლებში პირველი შეხვედრა 2021 წლის დეკემბერში, მოსკოვში გაიმართა. საქართველო ამ შეხვედრებში მონაწილეობაზე უარს აცხადებს.