ქართული ოცნების ლიდერი მამუკა მდინარაძე, პარტია "გახარია საქართველოსთვის" ლიდერ გიორგი გახარიაზე თავდასხმას გამოეხმაურა და თქვა, რომ ის "დადასტურებულად მოღალატეა", მაგრამ კვერცხების სროლა "მისაღები ფორმა არ არის".

"მათ რომ ჰკითხოთ, როცა სხვის მიმართ რაღაც განხორციელდება, ეს არის სამოქალაქო აქტივიზმი და თუ გახარიას მსგავსი ფორმებით ვიღაც დაუპირისპირდება — ის არის "ტიტუშკა" — ეს ორმაგი სტანდარტი ხომ არ არის? — მე, რომ ვთქვა მისაღები ფორმაა, დამიჯერებთ?! — რა თქმა უნდა, ეს არ არის მისაღები ფორმა, ნამდვილად. ვიდეოში გოგონა რაღაცას ეუბნება, ეს გასაგებია, მაგრამ შემდეგ ვიღაცა, რაღაცას ესვრის, არ არის მისაღები, ნამდვილად.

თუმცა, უნდა ჩამოვყალიბდეთ, "ქართული ოცნების" თანამდებობის თუ მხარდამჭერის მისამართით მისაღები ფორმაა, გახარიას წინააღმდეგ, რომელიც დადასტურებულად მოღალატეა, არ არის მისაღები. მე ვამბობ, რომ ასეთი დონის მოღალატესაც კვერცხები არ უნდა ესროლო. უბრალოდ, ფორმა არ არის მთლად გადასარევი და სხვა ფორმით შეიძლება სჯობდეს შენი პროტესტის გამოხატვა", — თქვა ოცნების ლიდერმა მამუკა მდინარაძემ.

პარტია გახარია საქართველოსთვის ინფორმაციით, მიუნხენის უსაფრთხოების კონფერენციიდან დაბრუნებულ გიორგი გახარიასა და ელგუჯა ხოკრიშვილს აეროპორტში ბიძინა ივანიშვილის მიერ ორგანიზებული ზონდერ-ჯგუფები დახვდნენ, რომლებსაც აბსოლუტური უმოქმედობით ხელი შეუწყო ადგილზე მყოფმა, ასევე წინასწარ გაფრთხილებულმა პოლიციამ.

"დღეს გამთენიისას მიუნხენის უსაფრთხოების კონფერენციიდან საქართველოში დაბრუნებისას გახარია საქართველოსთვის თავმჯდომარეს, გიორგი გახარიასა და ჩვენს თანაგუნდელს, გერმანიაში ყოფილ ელჩს, ელგუჯა ხოკრიშვილს თბილისის საერთაშორისო აეროპორტში ივანიშვილმა დაახვედრა წინასწარ ორგანიზებული, წინასწარ მომზადებული პარტიული ზონდერჯგუფი, რომლებსაც აბსოლუტური უმოქმედობით ხელი შეუწყო ადგილზე მყოფმა, ასევე წინასწარ გაფრთხილებულმა პოლიციამ.

ისტერიაში მყოფი მოძალადე ე.წ. ხელისუფლება უკონტროლო ხდება.

გასაგებია, რომ ივანიშვილი შეშინებულია მიუნხენის უსაფრთხოების კონფერენციის შედეგებით და ეს ისტერიაც ამითაა გამოწვეული.

ჩვენი პოლიტიკური ძალა გააკეთებს ყველაფერს, რომ ივანიშვილმა დაკარგოს მისთვის ყველაზე ძვირფასი — ფული და ძალაუფლება, რომ ვეღარასოდეს შეძლოს ქართველ ხალხზე ძალადობა", — ვკითხულობთ პარტიის მიერ სოციალურ ქსელში გავრცელებულ განცხადებაში.