თბილისის საქალაქო სასამართლოში ექიმ ვაჟა გაფრინდაშვილის სასამართლო პროცესი მიმდინარეობს.

გაფრინდაშვილმა სხდომის დაწყებამდე განაცხადა, რომ 27 იანვარს, რუსთაველის გამზირის გადაკეტვას ედავებიან, მაგრამ იმ დროს რუსთაველზე საერთოდ არ იმყოფებოდა.

"ეს იყო 27 იანვარს, საღამოს 8 საათსა და 17 წუთზე მედავებიან გზის გადაკეტვას, სამწუხაროდ იმ დროს იქ არ ვიყავი, მაქვს ამის საბუთი. იმ დროს ვიყავი სანაპიროზე მაკდონალდში. პირველ რიგში, მივცემ აცილებას მოსამართლე ნინო ენუქიძეს, იმიტომ, რომ სანქცირებულია" — განაცხადა ვაჟა გაფრინდაშვილმა მთავართან პროცესის დაწყებამდე.

ვაჟა გაფრინდაშვილს ადმინისტრაციულ სამართალდარღვევათა კოდექსის 174-ე პრიმა მუხლის მეოთხე ნაწილით გათვალისწინებული ქმედების ჩადენას ედავებიან. შსს-ს მტკიცებით, ის 27 დეკემბერს, რუსთაველის გამზირზე მიმდინარე საპროტესტო აქციაზე იმყოფებოდა და გზა ხელოვნურად იმ დროს გადაკეტა, როცა ამისთვის ადამიანების საკმარისი რაოდენობა არ იყო.