პარიზის პროკურატურამ მილიარდერი ილონ მასკის X Corp.-თან დაკავშირებით გამოძიება დაიწყო. ისინი ეჭვობენ, რომ სოციალური ქსელი X ალგორითმებით მანიპულირებს. ამის შესახებ ინფორმაცია, პარიზის პროკურატურაზე დაყრდნობით, 8 თებერვალს Politico-მ გაავრცელა.

გამოცემა წერს, რომ საჩივარი 12 იანვარს დეპუტატმა, ერიკ ბოტორელიმ შეიტანა. ის ამტკიცებდა, რომ "მიკერძოებულმა ალგორითმებმა მონაცემების დამუშავების ავტომატური სამუშაო დაამახინჯა".

დეპუტატის თქმით, მასკის პირადი ჩარევა "პლატფორმის მართვაში, ისევე როგორც ევროპის ქვეყნების რიგ არჩევნებში, დემოკრატიისთვის რეალურ საფრთხეს წარმოადგენს".

DW წერს, რომ გამოძიება, 10-11 თებერვალს დაგეგმილ, ხელოვნური ინტელექტის სამიტამდე რამდენიმე დღით ადრე დაიწყო. გამომძიებლები ასევე ეყრდნობიან მეორე საჩივარს, რომელიც თავდაპირველად ფრანგულმა ყოველკვირეულმა Le Canard enchaîné-მ გაავრცელა. საჩივარში წერია, რომ X გვთავაზობს "უზარმაზარ რაოდენობა სიძულვილით აღსავსე, რასისტულ, ანტი ლგბტ+ და ჰომოფობიურ პოლიტიკურ კონტენტს", რომელიც მიზნად ისახავს ძირი გამოუთხაროს დემოკრატიულ დებატებს საფრანგეთში.