აქტივისტები, უახლოეს მომავალში, რუსთაველზე 3 დიდ აქციას აანონსებენ. დაგეგმილი საპროტესტო ღონისძიებების ჩამონათვალი ასეთია:

18 თებერვალს — "ბოლომდე!";
25 თებერვალს — "დუმდა სიონი, არ დუმდა ხალხი!";
7 მარტს — "უწყვეტი პროტესტის მე-100 დღე".

აქციების ორგანიზატორები წერენ, რომ 18 თებერვალს, 20:00 საათზე, საქართველოს მოქალაქეები რუსთაველის გამზირზე შეიკრიბებიან და საქართველოს ერთპიროვნულ, დე-ფაქტო, არალეგიტიმურ მმართველს, ბიძინა ივანიშვილს, თავისივე დაბადების დღეზე, შეახსენებენ, რომ არ აპირებენ დანებებას და იბრძოლებენ ბოლომდე – სამართლიანი არჩევნებისთვის, სინდისის პატიმრების გათავისუფლებისთვის და თავისუფალი ქვეყნისთვის!

25 თებერვალს აქცია — "დუმდა სიონი, არ დუმდა ხალხი!" გაიმართება.

"ეს თარიღი ქართველებისთვის ორმაგად მნიშვნელოვანია, და თბილისის გასაბჭოების ამ თარიღზე არ დავუშვებთ, რომ 100 წლის შემდეგ ჩვენმა შვილებმა, შვილიშვილებმა და შვილთაშვილებმა კვლავაც დაწერონ მსგავსი ლექსები, რომ "დუმდა სიონი და დუმდა ხალხი!" ჩვენ ვიბრძოლებთ ბოლომდე და არ დავუშვებთ ამ ისტორიას მეორედ!", — წერენ ორგანიზატორები.

7 მარტს კი უწყვეტი პროტესტის მე-100 დღე სრულდება.

"მასობრივი პროტესტის მე-100 დღეს რუსთაველზე შევიკრიბებით ძალიან ბევრი საქართველოს მოქალაქე. კიდევ ერთხელ მოვითხოვთ საოკუპაციო რეჟიმის გაშვებას და ყველას დავანახებთ, რომ ჩვენ არ შევეგუებით ხელისუფლების უზურპაციას და დიქტატურის დამყარებას! ჩვენ ვიბრძოლებთ ბოლომდე და არ დავუშვებთ ქვეყნის მომავლის მოპარვას!", — ნათქვამია აქციის ორგანიზატორების მიერ გავრცელებულ ინფორმაციაში.

უახლოეს პერიოდში 3 დიდი აქცია იგეგმება

უახლოეს პერიოდში 3 დიდი აქცია იგეგმება