"ბოდიშის მოხდას როგორ სთხოვთ მოშიმშილე ქალს? ესე იგი, კანონმდებლობით კი არა, არამედ კაცის პირადი ბოღმით იხდის სასჯელს", — ამის შესახებ სოციალურ ქსელში მწერალი რეზო თაბუკაშვილი და "ოცნების" პრემიერის, ირაკლი კობახიძის განცხადებას ეხმაურება.

"ბოდიშის მოხდას როგორ სთხოვთ მოშიმშილე ქალს? ესე იგი, კანონმდებლობით კი არა, არამედ კაცის პირადი ბოღმით იხდის სასჯელს, რომელსაც სულგრძელობა არ ყოფნის, რომ აპატიოს ქალს და სასიკვდილოდ წირავს", – წერს სოციალურ ქსელში მწერალი რეზო თაბუკაშვილი და "ოცნების" პრემიერის, ირაკლი კობახიძის განცხადებას ეხმაურება, რომელმაც თქვა, რომ მოშიმშილე ჟურნალისტის მხრიდან "ვერ ხედავენ ვერანაირ სინანულს".

შეგახსენებთ, რომ კობახიძემ თქვა, რომ მოშიმშილე ჟურნალისტის, მზია ამაღლობელის მხრიდან "ვერ ხედავენ ვერანაირ სინანულს".

"მთავარი პრობლემა აქ არის ის, რომ ვერ ვხედავთ ვერანაირ სინანულს. პოლიციელს გაარტყეს ხელი სახეში და ნული სინანული ამასთან დაკავშირებით არც კონკრეტულად ბრალდებულის მხრიდან, არც მისი კოლეგების მხრიდან. ეს არის, რა თქმა უნდა, უკიდურესად შემაშფოთებელი, დანარჩენზე საზოგადოებამ უნდა გააკეთოს თავისი შეფასება," – თქვა ირაკლი კობახიძემ "ბათუმელებისა" და "ნეტგაზეთის" დამფუძნებლის, მზია ამაღლობელის შესახებ.

29 იანვარს ქალაქის მერმა, კახა კალაძემაც აღნიშნა, რომ "არ მოუსმენია თუნდაც სინანული, რომ გამოსულიყო [მზია ამაღლობელი] და ეთქვა ადამიანურად: "შეცდომა დავუშვი და მაპატიეთ".

"მინდა მზია ამაღლობელს ჯანმრთელობა ვუსურვო და ნებისმიერ პატიმარს. ერთი მარტივი შეკითხვა მაქვს, რის გამოა დაკავებული მზია ამაღლობელი? პოლიციელზე თავდასხმა, ხელის დარტყმა კატეგორიულად მიუღებელია. ადამიანები ვართ, ხომ? შეცდომა შეიძლება მოუვიდეს ყველას, შეიძლება შეცდომა დაუშვას ნებისმიერმა ადამიანმა, ადამიანები ვართ და ყველას მოგვსვლია შეცდომა. ადამიანმა ჩაიდინა დანაშაული, ხომ დანაშაულია როცა პოლიციელს ურტყამ ხელს?! არ მახსოვს, არ მომისმენია და დარწმუნებული ვარ, არავის მოუსმენია, თუნდაც სინანული. გამოსულიყო და ეთქვა ადამიანურად - შეცდომა დავუსვი და მაპატიეთ. მოგისმენიათ ეს? ირაკლი დგებუაძე არის ღირსეული პოლიციელი. მინდა შსს-ს თითოეულ თანამშრომელს გადავუხადო მადლობა, ვინც იცავს სახელმწიფოებრიობას, ვინც იცავს წესრიგს ქვეყანაში და არავის მიეცემა იმის უფლება და შესაძლებლობა, რომ მოაწყოს არეულობა, რომელიც გარედან იმართება", — თქვა კალაძემ.