სასოფლო-სამეურნეო დანიშნულების მიწის უცხო ქვეყნის მოქალაქის, ან მისი კომპანიის მიერ შეძენის შეზღუდვაზე კანონში ცვლილებების შეტანა იგეგმება. ამ საკითხზე კომიტეტის სხდომა ხვალ, 6 სექტემბერსაა ჩანიშნული.

როგორც ინტერპრესნიუსი წერს, სასოფლო-სამეურნეო დანიშნულების მიწის შეძენაზე შეზღუდვა, საბანკო საქმიანობის განხორციელების ფარგლებში, კომერციულ ბანკებზე არ გავრცელდება. თუმცა მათ შესაბამისი ქონება ორი წლის ვადაში უნდა გაასხვისონ.

როგორც სააგენტო წერს, გარდა ამისა, ცვლილებების პროექტით, დაგეგმილია, მთავრობისთვის დისკრეციის უფლების მიცემა, რაც მას, მიწის გასხვისების დროს, კანონისგან გამონაკლისების დაშვების შესაძლებლობას მისცემს.

პროექტის ინიციატორები ქართული ოცნების დეპუტატები: ანრი ოხანაშვილი, ეკა ბესელია, ვანო ზარდიაშვილი, დავით მათიკაშვილი, გურამ მაჭარაშვილი და ილია წულაია.

საქართველოს საპარლამენტო უმრავლესობის დეპუტატმა, ზაზა გაბუნიამ და მისმა 20-მდე კოლეგამ სასოფლო-სამეურნეო დანიშნულების მიწის გასხვისების შესახებ კანონპროექტი შეიმუშავეს, რომლის მიხედვითაც, საქართველოს მოქალაქეობის არ მქონე პირებს მიწის ყიდვა აღარ შეუძლიათ. მოქმედ კანონს მხარი საქართველოს პარლამენტის 115-მა დეპუტატმა დაუჭირა.

On.ge დაუკავშირდა ქართული ოცნების პრესსამსახურის თანამშრომელს, თუმცა, მისი თქმით, ამ საკითხზე 6 სექტემბრამდე ვერ ისაუბრებდნენ.