შინაგან საქმეთა სამინისტროს ინფორმაციით, ყვარლის მუნიციპალიტეტში, შილდის ტყეში ხანძარი, ფაქტობრივად, ლიკვიდირებულია. პრევენციის მიზნით, ადგილზე მეხანძრე-მაშველთა რამდენიმე ჯგუფი რჩება.

უწყების თქმით, ხანძრის კერები ლოკალიზებულია თუშეთში, სოფელ ხახაბოსთან არსებულ ტყეში და ვერტმფრენის გამოყენების აუცილებლობაც აღარაა:

"ადგილზე რჩება ცოცხალი ძალა, რომელიც ალტერნატიული ცეცხლმაქრი საშუალებებისა და წყლის ჭავლის გამოყენებით, ხანძრის ქრობის სამუშაოებს აგრძელებს. მეხანძრე-მაშველთა წყლით უზრუნველყოფა მთის ფერდობზე დამონტაჟებული ხელოვნური ავზების საშუალებით ხდება."

შსს-ს განცხადებით, ხანძრის სალიკვიდაციო სამუშაოები გრძელდება თელავის მუნიციპალიტეტის სოფელ ართანასთან. ცეცხლის ქრობის პროცესში მონაწილეობს ცოცხალი ძალა და სამი ერთეული საჰაერო ტექნიკა.

უწყების ინფორმაციით, ხულოს მუნიციპალიტეტში, შავნაბადას მთაზე არსებულ ტყის მასივში ხანძრის ლოკალიზების სამუშაოებში შსს-ს 400-მდე თანამშრომელია ჩართული და დილიდან სახანძრ-სამაშველო სამუშაოებში ჩართულია ვერტმფრენი.