ცნობილი ისლანდიელი მომღერალი და კომპოზიტორი ბიორკი, როგორც ჩანს, მუსიკის სტრიმინგ სერვისების დიდი მოყვარული არაა. შვედურ გაზეთთან უახლეს ინტერვიუში ბიორკმა სტრიმინგ გიგანტი Spotify გააკრიტიკა. საკითხს მუსიკოსი მას შემდეგ შეეხო, რაც სიტყვა ტურნეების ჩატარებაზე ჩამოვარდა.

"ცოცხლად შესრულება იყო და ყოველთვის იქნება ჩემი საქმიანობის მნიშვნელოვანი ნაწილი, მაგრამ გამიმართლა, რომ ფულის შესაგროვებლად ტურნეების გამართვა აღარ მიწევს, ეს კი ბევრ ახალგაზრდა მუსიკოსს უხდება", — განაცხადა ბიორკმა, — "სწორედ ამიტომ მიმაჩნია, რომ სპოტიფაიზე დიდი საშინელება მუსიკოსებს ალბათ არ დამართვიათ. სტრიმინგ კულტურამ მთელი საზოგადოება და მუსიკოსების თაობა შეცვალა".

ფოტო: Santiago Felipe / Getty Images

მართალია, სტრიმინგ პლატფორმების გამოჩენით მუსიკის არალეგალური გავრცელება შემცირდა, მაგრამ არტისტები ხშირად ანაზღაურების პრობლემაზე უსვამენ ხაზს. თითოეულ სტრიმზე პლატფორმები მუსიკოსებს $0,003-დან $0,005-მდე უხდიან, ეს თანხა კი მეტწილად საავტორო უფლებების მფლობელებს — ლეიბლებს ან გამომცემლებს — ერიცხებათ, რომლებიც ანაზღაურების დიდ ნაწილს იტოვებენ, დარჩენილ ფულს კი შემსრულებლებსა და ავტორებს უნაწილებენ. ამდენად, სტრიმინგიდან სათანადო შემოსავალი მხოლოდ ძალიან ცნობილ არტისტებს აქვთ, სხვებს კი საცხოვრებლად საკმარისი თანხის საშოვნელად ტურნეების გამართვა, ბრენდირებული საჩუქრების ("მერჩენდაიზის") გამოშვება და სხვადასხვა კომპანიასთან პარტნიორობა უწევთ.

თუმცა, პანდემიის შემდეგ, პოპულარული მუსიკოსების ტურნეებზეც იკლო ბილეთების გაყიდვებმა, ამ ყველაფრის ფონზე კი სტრიმინგ პლატფორმების შემოსავალი ყოველწლიურად იზრდება; Forbes-ის შეფასებით, სპოტიფაის თანადამფუძნებლისა და დირექტორის, დანიელ ეკის, ქონება $8 მილიარდს აღწევს.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...