დღეს, 5 სექტემბერს, საგამოძიებო სტატიების სერიის გამოქვეყნების შემდეგ, აზერბაიჯანის ხელისუფლებამ ქვეყანაში ორგანიზებული დანაშაულისა და კორუფციის გაშუქების პროექტის (OCCRP) ვებგვერდი დაბლოკა. ამის შესახებ ინფორმაცია On.ge-ს აზერბაიჯანელმა ჟურნალისტმა დაუდასტურა.

"აზერბაიჯანის ლონდრომეტი" (The Azerbaijan Laundromat) - ასე ჰქვია პროექტს, რომელზეც ევროპული გამოცემები, მათ შორის, ბრიტანული The Guardian, გერმანული Süddeutsche Zeitung, რუსული Novaya Gazeta და სხვები მუშაობდნენ.

OCCRP-ის ცნობით, "ლონდრომეტი" ფულის გათეთრების კომლექსური სქემაა. გამოძების თანახმად, აზერბაიჯანის მმართველი ელიტა ორი წლის განმავლობაში მართავდა 2,8 მილიარდ დოლარიან ფონდს ევროპელ პოლიტიკოსებთან ანგარიშსწორებისა და მათთვის ფუფუნების საგნების შეძენისთვის.

გამოძიების ცნობით, ერთი მხრივ, აზერბაიჯანი ჟურნალისტების, ადამიანის უფლებათა აქტივისტების, ოპოზიციონერების დაპატიმრების გამო, საერთაშორისო საზოგადოებისგან გაკიცხვას იღებდა, თუმცა აღნიშნული ფულით ალიევების რეჟიმმა, მინიმუმ, სამი ევროპელი პოლიტიკოსი, ჟურნალისტი და ბიზნესმენი მოისყიდა. გამოძიების მტკიცებით, ზოგიერთ შემთხვევაში მოსყიდული პირები მნიშვნელოვანი საერთაშორისო ორგანიზაციების, როგორიცაა UNESCO და ევროსაბჭოს საპარლამენტო ასამბლეა, მანიპულირებას ახერხებდნენ.

ფულის წარმომავლობა უცნობია, თუმცა, სტატიის თანახმად, პრეზიდენტ ილჰამ ალიევის ოჯახთან მისი კავშირის საკმარისი მტკიცებულებები არსებობს.