ევროსაბჭომ საქართველოზე ისეთი რეზოლუცია მიიღო, რუსეთს, აზერბაიჯანს და ბელორუსს არ უდებს ტოლს, — ამის შესახებ პარტია ახალის ლიდერი, ნიკა გვარამია სოციალურ ქსელში წერს და ევროსაბჭოს საპარლამენტო ასამბლეის მიერ საქართველოზე მიღებულ რეზოლუციას ეხმაურება.

გვარამიას თქმით, რეზოლუციის მოკლე შინაარსი ასეთია: "ცეცხლი ოლიგარქიას!"

"ევროსაბჭომ საქართველოზე ისეთი რეზოლუცია მიიღო, რუსეთს, აზერბაიჯანს და ბელორუსს არ უდებს ტოლს.

ევროკავშირში მიგვიღებენ კი არა, ევროსაბჭოდანაც გაგვრიცხავენ, ქოცები თუ არ გადავცალეთ სანაგვეში.

რეზოლუციის თანახმად:

ქართულ ოცნებას ევროსაბჭოს საპარლამენტო ასამბლეაში შერჩა დელეგაციის ყოლის ფორმალური უფლება, თუმცა ასამბლეის წევრის ფაქტობრივად ყველა ფუნქცია და პრივილეგია ჩამოერთვა.

რაც მთავარია, აპრილში მათი უფლებამოსილების საკითხთან დაბრუნებამდე, ოცნებას აქვს შემდეგი პირობები:

1. ახალი საპარლამენტო არჩევნების დანიშვნა უახლოეს თვეებში, მკაცრი საერთაშორისო მონიტორინგის ქვეშ, დამოუკიდებელი სახელმწიფო ინსტიტუტებისა და ცესკოს პირობებში

2. პოლიტიკური პატიმრების გამოშვება აპრილამდე

3. მოძალადეების პასუხისგებაში მიცემა და ძალადობის დასრულება

4. რუსული კანონის მთლიანად გაწვევა და ადმინისტრაციული სამართალდარღვევის კანონზე ვენეციის კომისიის დასკვნების გათვალისწინება

5. განაგრძოს ევროინტეგრაცია ევროკავშირის მიერ მოთხოვნილი რეფორმების გატარების საფუძველზე

p.s. რეზოლუციის მოკლე შინაარსი: ცეცხლი ოლიგარქიას!", — წერს ნიკა გვარამია.

დღეს, 29 იანვარს ევროსაბჭოს საპარლამენტო ასამბლეამ (PACE) საქართველოზე რეზოლუცია მიიღო, სადაც PACE ოცნებას ვადამდელი არჩევნების დანიშვნას და პოლიტპატიმრების გათავისუფლებისკენ მოუწოდებს. ამას გარდა, მომდევნო სესიამდე, რომელიც აპრილში გაიმართება ოცნების დელეგაციას შეზღუდული უფლებამოსილება ექნება.