"გახარია — საქართველოსთვის" ლიდერი, გიორგი გახარია პროკურატურამ დაზარალებულად ცნო — ინფორმაციას პარტიის პრესსამსახურში ადასტურებენ.

"ინტერპრესნიუსის" მიერ გავრცელებული ინფორმაციით, პარტია ამბობს, რომ საქმის მასალებს ადვოკატი გაეცნობა.

"ისედაც განადგურებულია მნიშვნელოვანი მტკიცებულებები და გვაინტერესებს, რა დევს საქმეში. ადვოკატი გაეცნობა საქმის მასალებს", — აცხადებენ პრესსამსახურში.

შეგახსენებთ, გიორგი გახარიაზე თავდასხმა 15 იანვარს, ბათუმში მდებარე სასტუმრო "შერატონში" "ქართული ოცნების" წევრების მხრიდან განხორციელდა. გახარია მომხდარის შედეგად საავადმყოფოშიც იმყოფებოდა, თუმცა მალევე კლინიკა დატოვა და მკურნალობა სახლში გააგრძელა. ექიმის განცხადებით, მას ცხვირის ძვლის მოტეხილობა და ტვინის შერყევა ჰქონდა.

ერთ-ერთი პირი, რომელიც გახარიას თავს დაესხა, არის "ოცნების" დეპუტატი, დიმიტრი სამხარაძე. იმავე სასტუმროში, პარტიის ლიდერზე თავდასხმამდე ცოტა ხნით ადრე, დიმიტრი სამხარაძე და მისი თანმხლები პირები არასამთავრობო სექტორის წარმომადგენელ, გიორგი ქორიძეს დაუპირისპირდნენ.