ამერიკელმა მილიარდერმა ილონ მასკმა ულტრამემარჯვენე გერმანულ პარტიას — ალტერნატივა გერმანიისთვის (Afd), მხარდაჭერა გამოუცხადა. აშშ-ის პრეზიდენტის ადმინისტრაციის წევრმა პარტიის საარჩევნო კამპანიის გახსნით ღონისძიებაზე შეკრებილ მხარდამჭერებს მიმართა.

Afd-ის აღმოსავლეთ გერმანიის ქალაქ ჰალეში შეკრებილი 4500 მხარდამჭერი მასკის ვიდეომიმართვას აპლოდისმენტებით შეხვდა.

მასკმა განუცხადა პარტიის ლიდერ ალის ვეიდელს, რომ 23 თებერვლის არჩევნებზე Afd გერმანიის "საუკეთესო იმედია".

ევროპის უდიდესი ეკონომიკის მქონე გერმანიაში თებერვალში ვადამდელი არჩევნები გაიმართება მას შემდეგ, რაც ოლაფ შოლცის მმართველი კოალიცია რამდენიმეთვიანი არასტაბილურობის შემდეგ დაიშალა.

მასკის თქმით, მნიშვნელოვანია, რომ "გერმანელმა ხალხმა გერმანიითა და გერმანელობით იამაყოს".

ამერიკელი მილიარდერი შეეხო იმიგრაციის პრობლემასაც — არჩევნების ერთ-ერთ მთავარ საკითხს და სთხოვა Afd-ის მხარდამჭერებს, რომ არ დაკარგონ ეროვნული სიამაყე "მულტიკულტურალიზმში, რომელიც ყველაფერს ამახინჯებს".