ევროპული საბჭოს მიერ გავრცელებული ინფორმაციით, ბრიუსელში, დღეს, 26 იანვარს, ევროკავშირის საგარეო საქმეთა საბჭოს შეხვედრა გაიმართება სადაც სხვა საკითხებთან ერთად, საქართველოში არსებულ ვითარებაზეც ისაუბრებენ.

იმავე ინფორმაციით, კონფერენციაზე ასევე განიხილავენ რუსეთის უკრაინის წინააღმდეგ რუსეთის აგრესიას, ხოლო მანამდე ევროკავშირის საგარეო საქმეთა მინისტრები უკრაინის საგარეო საქმეთა მინისტრთან, ანდრეი სიბიგასთან ვიდეოკონფერენციის საშუალებით არაფორმალურად აზრებს გაცვლიან.

აღნიშნულ საბჭოზე იქნება მსჯელობა ევროკავშირისა და აშშ-ის ურთიერთობებზეც. მინისტრები ახლო აღმოსავლეთში, მათ შორის სირიაში, ბოლო დროს განვითარებულ მოვლენებსაც განიხილავენ.

"საგარეო საქმეთა საბჭო განიხილავს მიმდინარე საკითხებს, ყურადღებას გაამახვილებს ბოლოდროინდელ მოვლენებზე და უსაფრთხოებისა და თავდაცვის სფეროში სწრაფად ცვლად ვითარებაზე. ამ პუნქტის ფარგლებში მინისტრები მოლდოვასა და საქართველოში განვითარებულ მოვლენებს შეეხებიან", — აღნიშნულია ინფორმაციაში.

ცნობისთვის, ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, კაია კალასი საგარეო საქმეთა საბჭოს შეხვედრას უხელმძღვანელებს.