"მე არ მინდა, ვლადიმირ პუტინს ვეხვეწო მოლაპარაკების მაგიდასთან დაჯდომას. მე მინდა, ვლადიმირ პუტინი ევედრებოდეს უკრაინას და უკრაინის მოკავშირეებს მოლაპარაკების მაგიდასთან დაჯდომას და იმაზე საუბარს, როგორ დავასრულოთ ეს ომი და როგორ გადავჭრათ ყველა პრობლემა, რომელიც გვაქვს", — ამის შესახებ პოლონეთის პრეზიდენტმა, ანდჟეი დუდამ დავოსში მსოფლიო ეკონომიკური ფორუმის პარალელურად ვიქტორ პინჩუკის ფონდის მიერ მოწყობილ უკრაინულ საუზმეზე განაცხადა. ინფორმაციას "ინტერფაქსი" ავრცელებს.

ამავე დროს, მან აღნიშნა, რომ უკრაინა "არ არის ადგილობრივი მნიშვნელობის ქვეყანა, ის გლობალური ქვეყანაა, ამიტომ საკითხი გლობალურ გადაწყვეტას მოითხოვს“.

"რუსეთი საერთაშორისო სამართალს პატივს არ სცემს, არც თავად რუსები, იმიტომ, რომ ისინი საერთაშორისო სამართალს ყოველდღიურად არღვევენ. ამიტომ, თუ ვსვამთ კითხვას, როგორ წავახალისოთ ვლადიმირ პუტინი, რომ სამშვიდობო მოლაპარაკებების მაგიდასთან დაჯდეს, ჩემი პასუხია: უნდა მივიღოთ ისეთი გადამწყვეტი ზომები, რომლებიც ვლადიმირ პუტინს აიძულებს, სამშვიდობო მოლაპარაკებები მოითხოვოს.", — განაცხადა დუდამ.