ცენტრალური საარჩევნო კომისიის განცხადებით, 2 სექტემბერს, ახალქალაქის საოლქო საარჩევნო კომისიის თავმჯდომარეს, ჰასმიკ მარანგოზიანს, სავარაუდოდ, საქართველოს პარლამენტის ყოფილი წევრი სამველ პეტროსიანი და მისი შვილი გიორგი პეტროსიანი (გამგებლის რწმუნებული) სიცოცხლის მოსპობით დაემუქრნენ.

გავრცელებული ინფორმაციით, ოლქის თავმჯდომარეს დაემუქრნენ როგორც საკუთარი სიცოცხლის მოსპობით, ისე ოჯახის წევრის უკანონო თავისუფლების აღკვეთითა და სახლის დაწვით.

ცესკოს თქმით, ჰასმიკ მარანგოზიანის განცხადებით, აღნიშნული პირების მხრიდან მსგავსი მუქარა მის მიმართ უკვე არაერთგზის განხორციელდა:

"გარდა ამისა, გუშინვე, სამველ პეტროსიანმა ქუჩაში მიმავალ ახალქალაქის საოლქო საარჩევნო კომისიის თავმჯდომარის მოადგილეს, პაატა ფანჯიკიძეს, მოპირდაპირე მხრიდან გაუჩერა მანქანა და მოსთხოვა ახსნა-განმარტებები მის საქმიანობასთან დაკავშირებით."

ცესკოს განმარტებით, მოწოდებული ინფორმაცია შესასწავლად პროკურატურას გადაეგზავნა.