CNN-ის ინფორმაციით, ღაზის სექტორში ცეცხლის შეწყვეტის შეთანხმება დაგეგმილზე სამი საათით გვიან შევიდა, ხოლო შეფერხების დროს, ისრაელმა კვლავ დაარტყა ანკლავს, რის შედეგადაც, ადგილობრივი ოფიციალური პირების თქმით, სულ მცირე 13 პალესტინელი დაიღუპა, ხოლო 30 დაიჭრა.

მედიის თქმით, ზავი ადგილობრივი დროით 8:30 საათზე უნდა ამოქმედებულიყო, თუმცა ისრაელი "ჰამასის" მიერ მძევლების სიის გადაცემას დაელოდა რომლებიც კვირას უნდა გათავისუფლდნენ.

"ჰამასის" თქმით, მძევლები, რომლებიც კვირას გათავისუფლდებიან არიან 31 წლის დორონ სტეინბრეჩერი, ბრიტანეთისა და ისრაელის მოქალაქე 28 წლის ემილი დამარი და 24 წლის რომი გონენი.

ცნობისთვის, "ჰამასის" მებრძოლებმა, 2023 წლის 7 ოქტომბერს ისრაელის ტერიტორიიდან გაიტაცეს 251 ადამიანი. ტყვეობაში 94 ადამიანი რჩება. 34 დაღუპულად ითვლება.

გაეროს პალესტინელ ლტოლვილთა სააგენტომ განაცხადა, რომ 4 000 სატვირთო მანქანა მზადაა ღაზის სექტორში შესასვლელად, რათა ადამიანებს საკვები და მედიკამენტები მიაწოდონ.