იმ ხალხის გამკვირვებია 7 ნოემბერს რომ აპროტესტებდა ქუჩაში ცემას და ხალხის ძვლებში დალეწვას და ახლა რომ ვერ ხედავს, — ამის შესახებ მსახიობი ანდრო ჭიჭინაძე ტვ პირველისთვის გაგზავნილ წერილში წერს.

მისი თქმით, დღეს რაც ქვეყანაში ხდება წინა ხელისუფლების სისტემური მემკვიდრეობაა.

"სოლიდარობა ერთ-ერთი ყველაზე მნიშვნელოვანი ქრისტიანული და ევროპული გამოხატულებაა, რომელიც ძალის და ენერგიის მომტანია. ევროპა, რომლის ნაწილიც ჩვენ ვართ, სწორედ ქრისტიანული კულტურის ცენტრია. ერთი და იგივე ფასეულობებზე დგას ეს ყველაფერი და ეს პროპაგანდით ვერ შეიცვლება. დღეს რაც ქვეყანაში ხდება წინა ხელისუფლების სისტემური მემკვიდრეობაა და იმ ხალხის გამკვირვებია 7 ნოემბერს რომ აპროტესტებდა ქუჩაში ცემას და ხალხის ძვლებში დალეწვას და ახლა რომ ვერ ხედავს. მაშინაც იღებდა ხმას ღირსეული ხალხი, დღესაც იღებს და ხვალაც ამოიღებს. ადამიანის უფლებების დარღვევაში ხმის ამოღებას „პერიოდი“ არ სჭირდება. სახელის დარქმევა ფაქტებზე ყველაფრისთვის კარგია პიროვნულადაც, პოლიტიკაშიც და ზოგადად ყველაფერში", - წერს ანდრო ჭიჭინაძე.

მსახიობი განსაკუთრებულ მადლობა უხდის სახელოვნებო სფეროს წარმომადგენლებს "ასეთი ერთიანობისა და შეუპოვრობისთვის".

"განსაკუთრებულად არავის გამოყოფა არ მინდა, იმდენად დიდი მხარდაჭერა და გვერდში დგომა იგრძნობა, მაგრამ დიდი მადლობა მინდა გადავუხადო სახელოვნებო სფეროს წარმომადგენლებს ასეთი ერთიანობისთვის და შეუპოვრობისთვის, სტუდენტებს გარეთ და უნივერსიტეტებში, რომლებიც იქ იძინებენ და იღვიძებენ", — წერს ანდრო ჭიჭინაძე.

შეგახსენებთ, რომ მსახიობი ანდრო ჭიჭინაძე 5 დეკემბერს დააკავეს. მას ბრალდება წარდგენილი აქვს სისხლის სამართლის კოდექსის 25-ე მუხლის მე-2 ნაწილით გათვალისწინებული დანაშაულის ჩადენაში, რაც ჯგუფურ ძალადობაში მონაწილეობას გულისხმობს. ბრალის დამტკიცების შემთხვევაში მას 4-დან 6 წლამდე თავისუფლების აღკვეთა ემუქრება.