პარტია "ფედერალისტების" ერთ-ერთმა ლიდერმა, თამარ ჩერგოლეიშვილმა, აშშ-დან გავრცელებულ პირდაპირ ჩართში განაცხადა, რომ აქვს ინფორმაცია კონკრეტულ პიროვნებებზე, რომლებიც ქართულმა ოცნებამ დაიქირავა ლობისტების სახით და ცდილობენ, ბიძინა ივანიშვილს სანქციები შეუმსუბუქონ.

"რაც არის კარგი ამბავი — არავის ეგონოს, რომ სანქციები ბიძინა ივანიშვილს არ ანაღვლებს. "ჯილდოა" და რაღაცებს რომ იძახიან, ეს არის სრული ბლეფი და სისულელე, იმიტომ, რომ ვიცით კონკრეტული ხალხი, ვინც დაიქირავეს ახლა და ნაჯახივით ურტყამენ ამ თემას, ცდილობენ მაქსიმალურად, რომ ბიძინა ივანიშვილს შეუმსუბუქონ ყოფა. ეს არის ყველაზე საეჭვო აქაური წრეებისთვის — როდესაც შენ შენთვის ცდილობ სიტუაციის შემსუბუქებას ისე, რომ შენი ქვეყნისთვის არაფერს არ ითხოვ, ეს არის ძალიან ნიშანდობლივი. ასე რომ, არ გეგონოთ, რომ სანქციები არ მუშაობს: სანქციები ძალიან დიდ დისკომფორტს უქმნის და წლების შემდეგ აი ახლა, პირველად გავიგეთ, რომ ჰყავთ ხალხი უშუალოდ ბიძინა ივანიშვილისთვის აქ, ტრამპთან და, როგორც ვიცი, ძალიან აქტიურად ცდილობს ამის [სანქციების] შემსუბუქებას.

ბევრი რამის პროგნოზირება შეუძლებელია, რადგან ადმინისტრაცია ჯერ კიდევ დასანიშნია და ვერ გეტყვით, რომ ყველაფერი ხვალვე იქნება, თუმცა ყოველ შემთხვევაში, იმას დარწმუნებით გეტყვით, რომ ჩინეთის, ირანისა და ჰეზბოლას მოკავშირეს, საბოლოო ჯამში, ვითარება შეუძლებელია შეუმსუბუქდეს იმ პოლიტიკურ წრეებში, ვისთანაც ჩვენ გუშინ შეხება გვქონდა", — განაცხადა ჩერგოლეიშვილმა.

ინფორმაციისთვის, დონალდ ტრამპის ინაუგურაციამდე ვაშინგტონში რესპუბლიკელების ყრილობა გაიმართა. წვეულებას საქართველოდან სალომე ზურაბიშვილის გარდა, "ფედერალისტების" ლიდერები — გიგა ბოკერია და თამარ ჩერგოლეიშვილი დაესწრნენ.

ისინი წვეულებაზე დონალდ ტრამპ უმცროსის მიწვევით იმყოფებოდნენ.