ბათუმის სახელმწიფო უნივერსიტეტის რექტორობის კანდიდატი არჩილ გუჩმანიძე სავარაუდო ზეწოლის ფაქტზე საუბრობს და აცხადებს, რომ უნივერსიტეტის რექტორის არჩევნებში მონაწილეობაზე უარის თქმას აიძულებენ. გუჩმანიძე ამბობს, რომ უკან დახევას არ აპირებს და მის მიმართ შესაძლო პროვოკაციებს ელის.

"დღეს ჩემი პოსტის გამოქვეყნებიდან 3 საათში დამიკავშირდნენ "კეთილისმყოფლები" და გადმომცეს: ,"ზევიდან""ითხოვენ, რომ შენ საბუთები უკან გამოიხმოო, ან არჩევნებში მონაწილეობა შეუმჩნევლად მიიღო, პოსტები წაშალოო და ა.შ, წინააღმდეგ შემთხვევაში პრობლემები გექნებაო, შენ ან შენო ოჯახის წევრებსო. დღეს საღამომდე მომცეს ვადა გადაწყვეტილების მიღების. ხოდა დღეს საღამოს მივიღე გადაწყვეტილება და ვეუბნები ქოცებს: გელოდებით 21 იანვარს 14 საათზე რექტორის არჩევნებზე, ვთხოვ მედია საშუალებებს დეტალურად გააშუქეთ პროცესი, ლაივში გადაეცით კანდიდატების გამოსვლა. არჩევნების დასრულების შემდგომ მომეცით საშუალება, გავაკეთო კომენტარი, ბევრ საინტერესო რაღაცებს გიამბობთ. ვთხოვ ყველა ბსუ-ელს , აკადემიურ პერსონალს დააფიქსირეთ თქვენი პოზიცია, უნივერსიტეტს ვკარგავთ! უნივერსიტეტს გვართმევენ!
ვფიქრობ, უახლოეს დღეებში პროვოკაციებს მომიწყობენ, ჩემთან მოდით მზად ვარ, ოჯახს თავი დაანებეთ.
მინდა გავაფრთხილო იცის "ვინც" — ჩემს ოჯახის რომელიმე წევრს, თმის ღერი რომ ჩამოუვარდეს..... იცი ამას არავის არ შევარჩენ! —წერს არჩილ გუჩმანიძე.

რამდენიმე საათის წინ არჩილ გუჩმანიძემ სოციალურ ქსელში ინფორმაცია გამოაქვეყნა, სადაც აცხადებდა, ბსუ-ს რექტორობის კანდიდატად დარეგისტრირდა. ის წერდა, რომ ეს გადაწყვეტილებმა ბსუ-ს პარტიულ სტრუქტურად გადაქცევის საფრთხემ მიაღებინა.