17 იანვარს საქართველო-აზერბაიჯანის ეკონომიკური თანამშრომლობის მთავრობათაშორისი კომისიის მე-10 სხდომის ფარგლებში ქართული ოცნების პრემიერმინისტრმა, ირაკლი კობახიძემ აზერბაიჯანში ვიზიტი გამართა.

დელეგაციაში იყო ოცნების საგარეო საქმეთა მინისტრი მაკა ბოჭორიშვილიც. ის 16 იანვარს შეხვდა აზერბაიჯანის საგარეო საქმეთა მინისტრ ჯეიხუნ ბაირამოვს. ბაირამოვმა შეხვედრის შემდეგ "ზოგიერთი დიდი სახელმწიფოს მხრიდან სხვა ქვეყნის სუვერენიტეტის წინააღმდეგ შიდა საქმეებში ჩარევის მცდელობებზე" ისაუბრა.

"დემონსტრაციული მცდელობების მომსწრენი გავხდით საქართველოს და აზერბაიჯანის მაგალითზე, ამის ნამდვილი მიზეზი არის ის, რომ ჩვენი ქვეყნები არა თუ დიდი ძალების კარნახით, არამედ საკუთარი სუვერენიტეტის პოლიტიკით მოქმედებენ. საქართველოში ვნახეთ ეს პროცესები არჩევნების სამართლიანად ჩატარების შემდეგ, ჩვენთან კი მას შემდეგ, რაც აღვადგინეთ ტერიტორიული მთლიანობა და ამის გამო, ჩვენი დასჯის სურვილი ჰქონდათ. საქართველო და აზერბაიჯანი — ორივე ქვეყანა განვითარებით ვართ დაინტერესებული. ჩვენი სურვილია, რომ საქართველოში იყოს სტაბილურობა და მშვიდობა. გვაქვს სამაგალითო მეზობლობა და ძმობა. პატივს ვცემთ ერთმანეთს და არ ვერევით ერთმანეთის საქმეებში და ასე უნდა იქცეოდეს ყველა ქვეყანა", — განაცხადა ბაირამოვმა.

ვიზიტის პირველ ნაწილში კობახიძე შეხვდა აზერბაიჯანის პრემიერმინისტრ ალი ასადოვს, მოგვიანებით კი ერთობლივი ბრიფინგი გამართა პრეზიდენტ ილჰამ ალიევთან.

სხდომა, ძირითადად, შეეხებოდა ორი ქვეყნის ეკონომიკურ დაახლოებას, ბაქო-თბილისი-ყარსის რკინიგზის პროექტს, სტრატეგიული პარტნიორობის მნიშვნელობასა და რეგიონული უსაფრთხოების საკითხებს. ვიზიტის ფარგლებში, საქართველოს ბაქოში მიწა გადაეცა, რომელზეც აზერბაიჯანში საქართველოს საელჩოს ახალი შენობა აშენდება.

კობახიძემ სომხეთსა და აზერბაიჯანს სამმხრივი თანამშრომლობის ინიციატივაც შესთავაზა.

"დარწმუნებული ვარ, რომ ერთობლივი ძალისხმევით არა თუ გადავლახავთ ყველა გამოწვევას, არამედ, გამოვიყენებთ არსებულ შესაძლებლობებს კიდევ უფრო ეფექტიანი თანამშრომლობისათვის. ჩვენ გულწრფელად ვართ დაინტერესებული განვახორციელოთ კონკრეტული პრაქტიკული ნაბიჯები და ხელი შევუწყოთ თანამშრომლობას რეგიონში. საქართველო მხარეებს სთავაზობს სამმხრივი თანამშრომლობის ინიციატივას, რომელიც ითვალისწინებს სამხრეთ კავკასიის სამივე ქვეყნის ჩართულობას სხვადასხვა სფეროების მიმართულებით", — განაცხადა კობახიძემ.

ალიევმა კობახიძე არჩევნებში, რომლის ლეგიტიმურობასაც საქართველოს მოსახლეობის მნიშვნელოვანი ნაწილი, ასევე დასავლელი პარტნიორების უმრავლესობა ეჭვქვეშ აყენებს, გამარჯვება კიდევ ერთხელ მიულოცა.

"თქვენი პარტიის წარმატება უზრუნველყოფს იმ ფაქტს, რომ სამხრეთ კავკასიაში იქნება სტაბილურობა, თქვენი ძმებისა და მეგობრების რანგში გვახარებს ეს წარმატება", — განაცხადა აზერბაიჯანის პრეზიდენტმა.

საპასუხოდ, ირაკლი კობახიძემ ილჰამ ალიევს "მისაბაძი და სამაგალითო ლიდერი" უწოდა.

შეხვედრის დასასრულს, კობახიძემ ილჰამ ალიევი საქართველოშიც მოიწვია.